পুনৰ উত্তপ্ত হৈ পৰিছে মণিপুৰ। উত্তৰ-পূবৰ ৰাজ্যখনত নতুনকৈ সংঘৰ্ষৰ সৃষ্টি হৈছে। মণিপুৰৰ বিষ্ণুপুৰত শুকুৰবাৰে নিশা পুনৰ সংঘৰ্ষৰ সৃষ্টি হয়। এই সংঘৰ্ষত কমেও ৩ জন লোকৰ মৃত্যু হোৱা বুলি কোৱা হৈছে। তদুপৰি, কেইবাটাও ঘৰত অগ্নিসংযোগ কৰাৰ ঘটনাও সংঘটিত হৈছে।
বাতৰি অনুসৰি, শুকুৰবাৰে মণিপুৰৰ বিষ্ণুপুৰ জিলাত পুনৰ কুকি আৰু মেইটেই জনগোষ্ঠীৰ মাজত সংঘৰ্ষ আৰম্ভ হয়। দুয়োপক্ষৰ মাজত হোৱা সংঘৰ্ষত কমেও তিনিজন লোকৰ মৃত্যু হোৱা বুলি জানিব পৰা গৈছে।
মৃত লোক কেইজন মেইটেই সম্প্ৰদায়ৰ বুলি জানিব পৰা গৈছে। তেওঁলোক কাৱাকাটা অঞ্চলৰ বাসিন্দা। সেই ঘটনাৰ পিছতে কুকি জনগোষ্ঠীৰ কেইবাটাও ঘৰত অগ্নিসংযোগ কৰাৰ খবৰ পোৱা গৈছে।
আৰক্ষীৰ সূত্ৰৰ পৰা জানিব পৰা মতে, দুয়োটা সম্প্ৰদায়ৰ মাজত সংঘৰ্ষ ৰোধ কৰিবলৈ সৃষ্টি কৰা বাফাৰ জ’ন পাৰ হৈ শুকুৰবাৰে নিশা একাংশ লোকে গুলীচালনা কৰে। ইয়াৰ পিছতে দুয়োপক্ষৰ মাজত ব্যাপক সংঘৰ্ষ আৰম্ভ হয়। সামগ্ৰী ধ্বংস কৰাৰ লগতে কেইবাটাও ঘৰত অগ্নিসংযোগ কৰাৰ ঘটনাও সংঘটিত হয়।
উল্লেখ্য যে কাৱাকটা অঞ্চলৰ দুই কিলোমিটাৰ আগত এটা বাফাৰ জ’ন সৃষ্টি কৰা হৈছে। নিৰাপত্তাৰ দায়িত্বত আছে কেন্দ্ৰীয় বাহিনী। সংঘাতৰ খবৰ পোৱাৰ লগে লগে তেওঁলোকে পৰিস্থিতিৰ সৈতে মোকাবিলা কৰিবলৈ আৰম্ভ কৰে। আনহাতে, আৰক্ষী বাহিনীও প্ৰেৰণ কৰা হৈছে।
দুদিন পূৰ্বে বিষ্ণুপুৰত মেইটেই গোটৰ প্ৰতিবাদকাৰীৰ সশস্ত্ৰ বাহিনীৰ সৈতে সংঘৰ্ষত উত্তেজনাৰ সৃষ্টি হৈছিল। অভিযোগ অনুসৰি, প্ৰতিবাদকাৰীয়ে থানা আৰু নিৰাপত্তাৰক্ষীৰ পৰা অস্ত্ৰ লুট কৰাৰ চেষ্টা চলাইছিল। সেইদিনা সংঘৰ্ষত ১৭ জন লোক আহত হয়। ইয়াৰ পিছতে পুনৰ পূব আৰু পশ্চিম ইম্ফলত কঠোৰ সান্ধ্য আইন জাৰি কৰা হয়।
