ইৰাকত সংঘটিত এক ভয়ংকৰ অগ্নিকাণ্ডত এখন হাইপাৰ মাৰ্কেট সম্পূৰ্ণৰূপে বিধ্বস্ত হৈ পৰে। এই অগ্নিকাণ্ডৰ ঘটনাত কমেও ৬০ জন লোকৰ মৃত্যু ঘটিছে। আন ১১ জন এতিয়াও সন্ধানহীন হৈ আছে। মৃতকৰ সংখ্যা বৃদ্ধি পোৱাৰ আশংকা কৰা হৈছে।
বৃহস্পতিবাৰে পুৱতি নিশা ইৰাকৰ পূব অঞ্চলৰ আল-কুট চহৰত সংঘটিত হয় এই ঘটনা। মহানগৰীৰ স্বাস্থ্য বিভাগ আৰু আৰক্ষীৰ দুটা জ্যেষ্ঠ সূত্ৰই আন্তঃৰাষ্ট্ৰীয় সংবাদ সংস্থাক জনোৱা মতে ইতিমধ্যে ৫৯টা মৃতদেহ চিনাক্ত কৰা হৈছে। কিন্তু এটা মৃতদেহ ইমানেই বেয়াকৈ জ্বলি গৈছে যে এতিয়াও চিনাক্ত কৰিব পৰা নাই।
প্ৰশাসনিক বিষয়া আলী আল-মায়াহীয়ে জনোৱা মতে আৰু বহুতৰে মৃত্যু হৈছে। এতিয়ালৈকে মৃতদেহ উদ্ধাৰ সম্ভৱ হোৱা নাই।
অগ্নিকাণ্ডৰ ভিডিঅ’ ছচিয়েল মিডিয়াত বিয়পি পৰিছে। দেখা গৈছে যে পাঁচ মহলীয়া এটা অট্টালিকা জ্বলি আছে, অগ্নিনিৰ্বাপক বাহিনীয়ে জুই নিয়ন্ত্ৰণ কৰিবলৈ চেষ্টা কৰি আছে।
জুই কেনেকৈ সূত্ৰপাত হ’ল সেয়া এতিয়াও স্পষ্ট হোৱা নাই। অৱশ্যে ইৰাকৰ ৰাজ্যিক সংবাদ সংস্থাক দিয়া এক বিবৃতিত গৱৰ্ণৰগৰাকীয়ে কয় যে ‘এই ঘটনাৰ তদন্ত আৰম্ভ হৈছে আৰু আগন্তুক ৪৮ ঘণ্টাৰ ভিতৰত ইয়াৰ প্ৰাৰম্ভিক প্ৰতিবেদন প্ৰকাশ কৰা হ’ব। হাইপাৰ মাৰ্কেটৰ মালিক আৰু বিল্ডিঙৰ মালিকৰ বিৰুদ্ধে আমি গোচৰ ৰুজু কৰিছো।’
