বৃহস্পতিবাৰে পুৱা গংগোত্ৰী অভিমুখে গৈ থকা এখন ব্যক্তিগত হেলিকপ্টাৰ দুৰ্ঘটনাত পতিত হয়। পুৱা প্ৰায় ৯ বজাত সংঘটিত হৈছে এই ঘটনা। উত্তৰকাশী জিলাত যাত্ৰীসহ দুৰ্ঘটনাগ্ৰস্ত হয় হেলিকপ্টাৰখন। এই পৰ্যন্ত ৫ জন লোকৰ মৃত্যু হোৱা বুলি জানিব পৰা গৈছে। দুজন আহত হৈছে।
দুৰ্ঘটনাৰ খবৰ পাই স্থানীয় ৰাইজে ঘটনাস্থলীত উপস্থিত হয়। আৰক্ষীও আহি ঘটনাস্থলীত উপস্থিত হয়। উদ্ধাৰ অভিযান আৰম্ভ কৰে। প্ৰাথমিকভাৱে গম পোৱা গৈছে যে দুৰ্ঘটনাগ্ৰস্ত হোৱা ব্যক্তিগত চপাৰখনত মুঠ ৭ জন লোক আছিল। ইয়াৰে মাত্ৰ দুজনকহে জীৱিত অৱস্থাত উদ্ধাৰ কৰা হয়। বাকী পাঁচজন লোকৰ মৃত্যু ঘটে।
উদ্ধাৰ কামৰ বাবে মাতি অনা হৈছে সেনাবাহিনীকে। আৰক্ষী, দুৰ্যোগ সঁহাৰি বাহিনী আৰু এম্বুলেন্সৰ সদস্য প্ৰেৰণ কৰা হৈছে। বিষয়াসকলো ঘটনাস্থলীলৈ ৰাওনা হৈছে। হেলিকপ্টাৰখনৰ দুৰ্ঘটনাৰ কাৰণ এতিয়াও জানিব পৰা হোৱা নাই।
গড়ৱালৰ সংমণ্ডল আয়ুক্ত বিনয় শংকৰ পাণ্ডেই চপাৰ দুৰ্ঘটনাৰ খবৰ নিশ্চিত কৰে। তেওঁ এটা সংবাদ সংস্থাক জনোৱা মতে, আজি পুৱা উত্তৰকাশী জিলাৰ গংগানানীৰ সমীপত এই ঘটনা সংঘটিত হয়। তেওঁ লগতে কয় যে প্ৰশাসন আৰু উদ্ধাৰকাৰী দলৰ সদস্যসকলে সেই স্থানত উপস্থিত হৈ উদ্ধাৰকাৰ্য চলাইছে।
