২০ বছৰ অনূৰ্ধ্বৰ বিশ্ব এথলেটিকছ চেম্পিয়নশ্বিপত স্বৰ্ণ আৰু তাৰ পাছত এছিয়ান গেইমছত ৰূপৰ পদক অৰ্জনেৰে এথলেটিকছ জগতত চাঞ্চল্যৰ সৃষ্টি কৰা অসম কন্যা হিমা দাসৰ এথলেটিকছ কেৰিয়াৰ এতিয়া সংকটত।
বিভিন্ন আন্তঃৰাষ্ট্ৰীয় প্ৰতিযোগিতাত দেশৰ নাম উজলোৱা হিমা আঘাতৰ সমস্যাৰে ভাৰাক্ৰান্ত। শেহতীয়াকৈ দোহাত অনুষ্ঠিত এছিয়ান এথলেটিকছ চেম্পিয়নশ্বিপৰ ৪০০ মিটাৰ দৌৰৰ মাজতে আঘাতপ্ৰাপ্ত হৈছিল হিমা। সেই আঘাতে এতিয়া বাধাৰ প্ৰাচীৰ হৈ থিয় দিছে হিমাৰ সন্মুখত।
অহা ১৩ মে’ৰ পৰা জাপানৰ য়ক’হামাত অনুষ্ঠিত হ’ব লগীয়া ৱৰ্ল্ড ৰিলেত হিমাৰ অংশগ্ৰহণ অনিশ্চয়তাত। আঘাতৰ সমস্যাৰে জুৰুলা হিমাক সম্পূৰ্ণ সুস্থ হৈ উঠিবলৈ আৰু কিছ সময়ৰ প্ৰয়োজন হ’ব বুলি ইতিমধ্যে এক সূত্ৰই প্ৰকাশ কৰিছে।
উল্লেখ্য যে হিমাই পিঠিৰ বিষৰ পৰা কিছু পৰিমানে উপশম পোৱাত অহা সোমবাৰৰ পৰা আৰম্ভ হ’ব লগীয়া প্ৰতিযোগিতাখনৰ বাবে নিজকে প্ৰস্তুত কৰি তুলিবলৈ পুনৰ ৫ মে’ৰ পৰা অনুশীলন আৰম্ভ কৰিছিল। কিন্তু এতিয়াও প্ৰতিযোগিতাখনত তেওঁৰ অংশগ্ৰহণ নিশ্চিত হোৱা নাই।
‘এইটো সপ্তাহৰ আৰম্ভণিৰ পৰা হিমা দাসে ৱৰ্ড ৰিলেত অংশ ল’ব লগীয়া দলৰ সৈতে অনুশীলন আৰম্ভ কৰিছিল। সম্পূৰ্ণ সুস্থ হৈ উঠিবলৈ তেওঁক কিছু পৰিমাণে ব্যায়াম আৰু কিছু সময়ৰ আৰামৰ প্ৰয়োজন। আমি তেওঁৰ ওপৰত অতি সূক্ষ্ম দৃষ্টি ৰাখিছো’। হিমাৰ আঘাত সম্পৰ্কত এইদৰে কয় ৰাষ্ট্ৰীয় উপ মুখ্য প্ৰশিক্ষক ৰাধাকৃষ্ণন নায়াৰে।
যদিহে হিমাই জাপানত অনুষ্ঠিত হ’ব লগীয়া আগন্তুক ৱৰ্ল্ড ৰিলেত দৌৰিব নোৱাৰাটো নিশ্চিত হয় তেন্তে এথলীটগৰাকী তথা টিম মেনেজমেণ্টৰ বাবে এয়া এক চিন্তনীয় বিষয় হৈ পৰিব। কিয়নো সন্মুখত কেইবাখনো আন্তঃৰাষ্ট্ৰীয় প্ৰতিযোগিতা। লগতে অহা বৰ্ষত অনুষ্ঠিত হ’ব অলিম্পিক গেইমছ। সেয়ে হিমা সম্পূৰ্ণ সুস্থ হৈ উঠাতো দেশৰ বাবে প্ৰয়োজনীয়।
