ভাৰতীয় কিষাণ ইউনিয়নৰ মুখপাত্ৰ ৰাকেশ টিকাইতক লক্ষ্য কৰি আজি বাংগালুৰুত ক’লা চিয়াহী নিক্ষেপ কৰে একাংশ লোকে।
তেওঁ বাংগালুৰুত আজি এখন সংবাদমেল সম্বোধন কৰি আছিল। ঘটনাটোৰ ভিডিঅ’ ইতিমধ্যে সামাজিক মাধ্যমত ভাইৰেল হৈ পৰিছে।
৩০ ছেকেণ্ড দৈৰ্ঘৰ ভিডিঅ’টোত টিকাইতৰ মুখত ক’লা চিঁয়াহী নিক্ষেপ কৰি একাংশ লোকে চিঞৰ বাখৰ কৰা আৰু চকী দলিয়াই থকা দেখা গৈছে।ভিডিঅ’টোত লোকসকলে ‘মোডী-মোডী’ উচ্চাৰণ কৰাও শুনা গৈছে।
টিকাইতলৈ চিঁয়াহী নিক্ষেপ কৰাৰ পিছতে টিকাইতৰ সমৰ্থক আৰু চিঁয়াহী নিক্ষেপ কৰাৰ কাম কৰা লোকসকলৰ মাজত হোৱা হতাহতিও লাগে।
উল্লেখ্য তিনি খনকৈ কৃষি আইনৰ বিৰুদ্ধে কৃষকসকলৰ প্ৰতিবাদৰ নেতৃত্ব দিয়া এজন কৃষক নেতা ৰাকেশ টিকাইটে আজি বাংগালুৰুত এখন সংবাদমেল সম্বোধন কৰিছিল।
টিকাইটে অনুষ্ঠানস্থলীত চৰকাৰে নিৰাপত্তা প্ৰদান নকৰাৰ অভিযোগ উত্থাপন কৰিছে।
কোনে কি উদ্দেশ্যলৈ কৃষক নেতাজনলৈ চিঁয়াহী নিক্ষেপ কৰিলে সেয়া এতিয়াও স্পষ্ট হোৱা নাই।
