চীনৰ ভাবুকি: আমেৰিকা-ব্ৰিটেইন-অষ্ট্ৰেলিয়াই গঢ়িব সন্মিলিত মিছাইল প্ৰযুক্তি
ভাৰত-প্ৰশান্ত মহাসাগৰীয় অঞ্চলত ক্ৰমাগত ভাবে বৃদ্ধি পোৱা চীনৰ আধিপত্যৰ পৰিপ্ৰেক্ষিততে আমেৰিকা-ব্ৰিটেইন-অষ্ট্ৰেলিয়াই সন্মিলিত ভাবে এক মিছাইল প্ৰযুক্তি গঢ়ি তোলাৰ সিদ্ধান্ত গ্ৰহণ কৰিছে।
আজি মাৰ্কিন ৰাষ্ট্ৰপতি জো বিদেন,ব্ৰিটেইনৰ প্ৰধানমন্ত্ৰী বৰিছ জনছনআৰু অষ্ট্ৰেলিয়াৰ প্ৰধানমন্ত্ৰী স্কট মৰিছনে প্ৰকাশ কৰা বিবৃতিত এই বুলি উল্লেখ কৰিছে যে নতুন মিছাইল প্ৰযুক্তিটো অষ্ট্ৰেলিয়াক প্ৰদান কৰা হ’ব।
অষ্ট্ৰেলিয়াই দেশ খনৰ জলভাগত এই প্ৰযুক্তি ব্যৱহাৰ কৰি পাৰমাণৱিক শক্তি সম্পন্ন ছাবমেৰিন স্থাপন কৰিব পাৰিব।
বিবৃতিটোত লগতে কোৱা হৈছে যে অষ্ট্ৰেলিয়াই বহিঃ ৰাষ্ট্ৰৰ পৰা আহিব পৰা ভাবুকি প্ৰতিহত কৰিব পৰাকৈ এই প্ৰযুক্তি ব্যৱহাৰ কৰিব পাৰিব।
মাৰ্কিন ৰাষ্ট্ৰপতি বিদেনে কৈছে যে ভাৰত-প্ৰশান্ত মহাসাগৰীয় অঞ্চলত শান্তি বৰ্তাই ৰখাৰ স্বাৰ্থতে এনে ব্যৱস্থা হাতত লোৱা হৈছে।
অষ্ট্ৰেলিয়াৰ প্ৰধানমন্ত্ৰী মৰিছনে কৈছে যে দক্ষিণ অষ্ট্ৰেলিয়াৰ এডেলেইডত এই প্ৰযুক্তিৰ সহায়ত পাৰমাণৱিক শক্তি সম্পন্ন ছাবমেৰিন তৈয়াৰ কৰা হ’ব।
এই ক্ষেত্ৰত সকলো পাৰমাণৱিক নীতি মানি চলা হ’ব বুলিও তেওঁ মন্তব্য কৰে।
দক্ষিণ চীন সাগৰৰ লগতে টাইৱানত চীনে বিস্তাৰ কৰা আধিপত্য ৰোধ কৰাৰ বাবেই বিশ্বৰ তিনি খনকৈ শক্তিশালী দেশে এনে ব্যৱস্থা গ্ৰহণ কৰিছে বুলি জানিব পৰা গৈছে।
অৱশ্যে বিবৃতিটোৰ ক’তো কোনো এখন দেশেই চীনৰ নাম পোণপটীয়াকৈ উল্লেখ কৰা নাই।
আমেৰিকাত থকা চীনৰ দূতাবাসে এনে পদক্ষেপে যাতে তৃতীয় পক্ষৰ কোনো ক্ষতি সাধন নকৰে সেই বিষয়ত সচেষ্ট হ’বলৈ সকলোকে আহ্বান জনাইছে।