বিশ্বজুৰি মহামাৰী ক’ৰ’ণাই সংহাৰৰ সৃষ্টি কৰি থকাৰ সময়তে ১৭০ খনৰো অধিক দেশে ক’ৰ’ণাৰ ভেকচিন আবিষ্কাৰৰ বাবে চেষ্টা অব্যাহত ৰাখিছে।
ৰাছিয়াৰ দৰে দেশে কোভিডৰ ভেকচিন আবিষ্কাৰ কৰা বুলি ইতিমধ্যে দাবী কৰিছে।
ভাৰতকে ধৰি বিশ্বৰ আন ভালেকেইখন দেশত চলি আছে অক্সফোৰ্ড-এষ্ট্ৰাজেনিকাৰ ভেকচিনৰ পৰীক্ষণ।
এনে পৰীক্ষণে ইতিমধ্যে বেছ ভাল ফলাফল দেখুৱাবলৈ সক্ষম হৈছে। আশা কৰা হৈছে খুব কম দিনৰ ভিতৰতে অক্সফোৰ্ড-এষ্ট্ৰাজেনিকাৰ ভেকচিন বজাৰলৈ আহিব।
এনে সময়তে এগৰাকী ইছলামিক ধৰ্মগুৰুৱে মুছলমান লোক সকলক কোভিডৰ ভেকচিন গ্ৰহণ নকৰিবলৈ জনোৱা আহ্বানে তীব্ৰ প্ৰতিক্ৰিয়াৰ সৃষ্টি কৰিছে।
ছুফিয়ান খলিফা নামৰ ইমাম গৰাকীয়ে শেহতীয়াকৈ প্ৰচাৰ কৰা এক ভিডিঅ’ বাৰ্তাত কৈছে যে অক্সফোৰ্ড-এষ্ট্ৰাজেনিকাৰ কোভিড ভেকচিন প্ৰস্তুত কৰা হৈছে গৰ্ভপাত কৰা মহিলাৰ গৰ্ভত থিতাপি লোৱা শিশুৰ কোষৰ পৰা ।
সেয়ে ইছলামৰ দৃষ্টিকোণৰ পৰা এয়া হাৰাম অৰ্থাৎ পাপ।
ইমাম গৰাকীয়ে সেয়ে কোনো পৰিস্থিতিতে মুছলমান লোক সকলক কোভিডৰ ভেকচিন গ্ৰহণ নকৰিবলৈ আহ্বান জনাইছে।
অষ্ট্ৰেলিয়াৰ এই গৰাকী ইমামে এনে আহ্বান জনোৱাৰ সমান্তৰাল ভাবে দেশখনৰ কেথলিক খ্ৰীষ্টান সকলেও একেটা কাৰণতে কোভিডৰ ভেকচিন নিষিদ্ধ কৰাৰ দাবী জনাইছে।
অষ্ট্ৰেলিয়াৰ আৰ্ক বিছপ এন্টনী ফিচাৰে দেশখনৰ প্ৰধানমন্ত্ৰীলৈ লিখা এখন পত্ৰত মৃত শিশুৰ কোষৰ পৰা প্ৰস্তুত কৰা ভেকচিন খ্ৰীষ্টান সকলে গ্ৰহণ কৰাটো পাপ হ’ব বুলি উল্লেখ কৰিছে।
উল্লেখ্য অষ্ট্ৰেলিয়াই প্ৰায় আঢ়ৈ কোটি ভেকচিনৰ ফৰমাইচ দিছে।
