কাজিৰঙা ৰাষ্ট্ৰীয় উদ্যান কৰ্তৃপক্ষৰ উদ্যোগত প্ৰকৃতি সংগঠন ‘আৰণ্যক’ আৰু ‘ভুমি’ৰ সহযোগত আজি বোকাখাতৰ ধনশিৰিমুখ জনজাতি উচ্চ মাধ্যমিক বিদ্যালয়ত বানপানীত লবলগা সাৱধনতা, সুৰক্ষা আৰু বন্যপ্ৰাণী সংৰক্ষণৰ বিষয়ত এক বিশেষ সজাগতা সভা অনুষ্ঠিত কৰা হয়৷
অনুষ্ঠানত ধনশিৰিমুখ জনজাতি উচ্চ মাধ্যমিক বিদ্যালয়ৰ সমুহ শিক্ষক-শিক্ষয়ত্ৰী আৰু ছাত্ৰ ছাত্ৰীৰ উপৰিও পৰিচালনা সমিতি, বহিখোৱা পাৰিপাৰ্শ্বিক উন্নয়ন সমিতি, গাওঁৰক্ষী বাহিনী আৰু মুকক নামৰ সংগঠনটোৰ বিষয়ববীয়াৰ লগতে স্থানীয় লোকে অংশ গ্ৰহণ কৰে৷
গোলাঘাট জিলাৰ অনাৰেৰী ৱাইল্ড লাইফ ৱাৰ্ডেন উত্তম শইকীয়াই আঁত ধৰা সভাখনত কাজিৰঙা ৰাষ্ট্ৰীয় উদ্যানৰ উপ বন সংৰক্ষক খৰ্গৰাম ডেকা ৰজা, সহকাৰী বন সংৰক্ষক কৃষ্ণকান্ত দেউৰী, অগৰাতলিৰ বনাঞ্চলিক বিষয়া ধৰণী বৰা, বোকাখাত মহকুমাৰ দুৰ্যোগ ব্যৱস্থাপনা বিভাগৰ বিষয়া পাৰ্থ প্ৰতীম বৰা, ‘মুকক’ নামৰ সংগঠনটোৰ সভাপতি বিজু পেগু, বহিখোৱা পাৰিপাৰ্শ্বিক উন্নয়ন সমিতিৰ সভাপতি চন্দ্ৰ দলে, প্ৰধান শিক্ষয়ত্ৰী মামনি হাজৰিকা, মাধ্যমিক বিদ্যালয়ৰ প্ৰধান শিক্ষক সঞ্জীৱ চক্ৰৱতী আৰু অৰণ্যকৰ অনিমেষ শইকীয়া আৰু অঙ্কুৰ নাহক উপস্থিত থাকি বানপানীত লবলগা সাৱধানতা আৰু বন্যপ্ৰাণীৰ সুৰক্ষাৰ সম্পৰ্কত পৰামৰ্শ আগবঢ়ায়৷
আনহাতে, অনুষ্ঠানত বিদ্যালয়খনৰ প্ৰাক্তন ছাত্ৰী পপী পেগুৱে উচ্চতৰ মাধ্যমিক চূড়ান্ত পৰীক্ষাত বিজ্ঞান শাখাত চাৰিটা বিষয়ত লেটাৰ লৈ সুখ্যাতিৰে উত্তীৰ্ণ হৈ ধনশিৰিমুখ অঞ্চললৈ সুনাম কঢ়িয়াই অনাৰ বাবে কাজিৰঙা ৰাষ্ট্ৰীয় উদ্যান কৰ্তৃপক্ষৰ তৰফৰ পৰা বিশেষভাৱে সম্বৰ্ধনা জনোৱা হয়৷
বান সজাগতাৰ পৰৱৰ্তী সভা ধোৱাআটি প্ৰাথমিক বিদ্যালয়, বামুনগাওঁ প্ৰাথমিক বিদ্যালয়, কান্ধুলিমাৰী প্ৰাথমিক বিদ্যালয় আৰু তামুলীপথাৰ মাধ্যমিক বিদ্যালয়ত অনুষ্ঠিত হব বুলি উদ্যোক্তা সকলে জনাইছে৷
