বদৰপুৰৰ কংগ্ৰেছী বিধায়ক জামাল উদ্দিন আহমেদৰ আকস্মিক দেহাৱসান
কংগ্ৰেছ নেতা তথা বদৰপুৰ সমষ্টিৰ বিধায়ক জামাল উদ্দিন আহমেদৰ ২৬ জানুৱাৰি নিশা দেহাৱসান ঘটে।
হঠাৎ অসুস্থ হৈ পৰা বিধায়ক গৰাকীক চিকিৎসালয়লৈ লৈ গৈ থকা পথতে মৃত্যু হয় বুলি জানিব পৰা গৈছে।
মৃত্যুৰ সময়ত বদৰপুৰ সমষ্টিৰ বিধায়ক গৰাকীৰ বয়স আছিল ৬৬ বছৰ।
হৃদৰোগ জনিত সমস্যাত ভূগি থকা জামাল উদ্দিনৰ তেজত গ্লুক’জৰ পৰিমাণ অতিমাত্ৰা হ্ৰাস পোৱাৰ ফলতে মৃত্যু হয় বুলি চিকিৎসকে প্ৰকাশ কৰে।
জামাল উদ্দিনে ২০০১ চনত প্ৰথমবাৰৰ বাবে তৃণমূল কংগ্ৰেছৰ পৰা অসম বিধানসভালৈ বিধায়ক হিচাপে নিৰ্বাচিত হৈছিল আৰু পৰৱৰ্তী সময়ত কংগ্ৰেছ দলত তেওঁ যোগদান কৰে।
কংগ্ৰেছৰ দলৰ পৰা প্ৰয়াত জামাল উদ্দিনে ২০১১ আৰু ২০১৬ চনত অসম বিধান সভালৈ নিৰ্বাচিত হয়।
জামাল উদ্দিনৰ বিয়োগত কংগ্ৰেছ দলৰ লগতে অসম বিধানসভাৰ প্ৰায়বোৰ বিধায়কে গভীৰ শোক ব্যক্ত কৰে।
আনহাতে, একেদিনাই আন এগৰাকী কংগ্ৰেছ নেত্ৰী তথা দেৰগাঁও সমষ্টিৰ প্ৰাক্তন বিধায়িকা আৰতি হাজৰিকা কছাৰীৰ দেহাৱসান ঘটে।
এটা দিনতে দুগৰাকীকৈ কংগ্ৰেছৰ নেতাৰ বিয়োগ দলটোৰ বাবে এক অপুৰণীয় ক্ষতি।