৭২ সংখ্যক গণৰাজ্য দিৱসৰ দিনাখনে গোৱালপাৰা জিলাৰ কৃষ্ণাইৰ বুকুত প্ৰতিষ্ঠা লাভ কৰিলে এখন নৱ শিক্ষানুষ্ঠানে।
কৃষ্ণাই মোলানডুবিত প্ৰতিষ্ঠা কৰা শিক্ষানুষ্ঠান খনৰ নাম নৰপতি জাতীয় বিদ্যালয়।
এই উপলক্ষ্যে মঙলবাৰে পুৱা শিক্ষানুষ্ঠানখনৰ চৌহদত এখন উদ্বোধনী সভাৰ আয়োজন কৰা হয়। অনুষ্ঠানত পুৱা ৮-৩০ বজাত গণতন্ত্ৰ দিৱস উপলক্ষে জাতীয় পতাকা উত্তোলন কৰে আলহাজ আনোৱাৰ হুছেইনে।
১০ বজাত নৰপতি জাতীয় বিদ্যালয়ৰ দ্বাৰ মুকলি কৰে পণ্ডিত দীনদয়াল উপাধ্যায় আদৰ্শ মহাবিদ্যালয়,আমজোঙাৰ অধ্যক্ষ ড° নৱজ্যোতি শৰ্মাই।
১০ বজাৰ পৰা অনুষ্ঠিত হয় উদ্বোধনী সভা। অৱসৰপ্ৰাপ্ত বিদ্যালয় পৰিদৰ্শক আলহাজ আনোৱাৰ হুছেইনৰ সভাপতিত্বত অনুষ্ঠিত সভা খনৰ উদ্দেশ্য ব্যাখ্যা কৰে নৰপতি জাতীয় বিদ্যালয় পৰিযালনা সমিতিৰ সম্পাদক নাছিৰ উদ্দিন আহমেদে।
হাব্ৰাঘাট মহাবিদ্যালয়, কৃষ্ণাইৰ অৱসৰপ্ৰাপ্ত অধ্যাপক জোনাৱ আলীয়ে উদ্বোধনী গীত পৰিবেশন কৰা সভাখনত পৰিচালনা সমিতিৰ হৈ ভাষণ প্ৰদান কৰে বিদ্যালয় পৰিচালনা সমিতিৰ কোষাধ্যক্ষ ছাহেৰা বেগম(মীৰা)য়ে।
সাংবাদিক নীলমণি শৰ্মাই আঁত ধৰা উদ্বোধনী সভাখনত হাব্ৰাঘাট মহাবিদ্যালয়ৰ অধ্যক্ষ ড° মন্টু কুমাৰ দাস, দলগোমা মহাবিদ্যালয়ৰ অধ্যাপক নজৰুল ইছলামকে ধৰি কেবাজনো বিশিষ্ট লোক উপস্থিত থাকে।
