এইবাৰ কেন্দ্ৰীয় সংস্থা এনফ’ৰ্চমেণ্ট ডাইৰেক্টৰেট, চমুকৈ ই.ডি- এ প্ৰৱেশ কৰিছে অসমৰ ৰাজনীতিত। এআইইউডিএফৰ বিধায়ক কৰিমুদ্দিন বৰভূঞাই দলৰ মুৰব্বী বদৰুদ্দিন আজমলক কেন্দ্ৰীয় সংস্থাটোৱে জেৰা কৰিছে বুলি দাবী কৰাৰ পিছত হঠাতে বিষয়টোৱে ব্যাপক চৰ্চা লাভ কৰিছে।
কৰিমুদ্দিন বৰভূঞাই মঙ্গলবাৰে সংবাদ মাধ্যমৰ আগত এআইইউডিএফ প্ৰধান বদৰুদ্দিন আজমল ইডিৰ ৰোষত পৰিছে বুলি অভিযোগ কৰিছিল।
বৰভূঞাই অভিযোগ কৰিছিল যে আয়ৰ উৎস বিচাৰি তিনিবাৰকৈ ইডি-এ আজমলক জেৰা কৰিছে। কেৱল বদৰুদ্দিন আজমলেই নহয়, তেওঁৰ কনিষ্ঠ ভাতৃ ছিৰাজুদ্দিন আজমলকো সংস্থাটোৱে জেৰা কৰিছে বুলি কৰিমুদ্দিন বৰভূঞাই সংবাদ মাধ্যমৰ আগত উল্লেখ কৰিছিল।
আজমল ভাতৃদ্বয়ৰ বিৰুদ্ধে ৰাজনৈতিক অভিসন্ধি পূৰণৰ বাবে অসমৰ মুখ্যমন্ত্ৰী হিমন্ত বিশ্ব শৰ্মা আৰু কেন্দ্ৰীয় গৃহমন্ত্ৰী অমিত শ্বাহে ইডিৰ ব্যৱহাৰ কৰিছে বুলি অভিযোগ উত্থাপন কৰিছিল বিধায়কগৰাকীয়ে।
পিছে দলৰ বিধায়ক গৰাকীৰ এই মন্তব্যৰ বিপৰীতে সম্পূৰ্ণ এক পৃঠক স্থিতি গ্ৰহণ কৰিছে বদৰুদ্দিন আজমলে। ইডিৰ জেৰা সন্দৰ্ভত সম্পূৰ্ণ ভুৱা খবৰ প্ৰচাৰ হৈছে বুলি আজমলে মন্তব্য কৰিছে।
এক ভিডিঅ’ বাৰ্তাযোগে আজমলে ইডি – এ তেওঁক কেতিয়াও জেৰা কৰা নাই বুলি দাবী কৰে।
তেওঁ কয় যে যোৱা তিনিদিন ব্যৱসায় সংক্ৰান্তত তেওঁ বাংগালুৰুত আছিল আৰু এই সময়ত তেওঁৰ দিল্লীস্থিত বাসভৱনত ইডি- ৰ অভিযান চলা বুলি যি বাতৰি প্ৰচাৰ হৈছে সেয়া ১০০ শতাংশ মিছা বাতৰি।
পিছে দলীয় বিধায়ক কৰিমুদ্দিন বৰভূঞা আৰু আজমলৰ এই বিপৰীত ভাষ্যই সন্দেহৰ সৃষ্টি কৰিছে। যোৱা কিছুদিন ধৰি বদৰুদ্দিন আজমলৰ এআইইউডিএফ আৰু বিজেপিৰ মাজত গোপন মিতিৰালি চলা বুলি অভিযোগ উঠি আহিছে।
নিজৰ ব্যৱসায়ৰ স্বাৰ্থত আজমলে শাসকীয় বিজেপি দলক সহায় আগবঢ়াই আহিছে বুলি অভিযোগ কৰি আহিছে বিৰোধী ৰাজনৈতিক দলৰ লগতে ৰাজনৈতিক বিশ্লেষক সকলে।
সেয়েহে আজমল তথা এআইইউডিএফৰ এই এনফ’ৰ্চমেণ্ট ডাইৰেক্টৰেট, চমুকৈ ইডি- ৰ এই বিতৰ্কৰ দ্বাৰা এই অভিযোগসমূহক নস্যাৎ কৰিবলৈ বিচৰা হৈছে বুলি ব্যাপক চৰ্চা চলিছে।
