কানাডা অ’পেনত ৰূপৰ পদক পি কাশ্যপৰ; হিমন্ত বিশ্বৰ অভিনন্দন
য়’নেক্স কানাডা অ’পেন বেডমিণ্টন টুৰ্ণামেণ্টত ৰূপৰ পদকেৰে অভিযান সামৰা ভাৰতৰ আগশাৰীৰ শ্বাটলাৰ পাৰুপল্লী কাশ্যপক অভিনন্দন জনাইছে বেডমিণ্টন এছ’চিয়েশ্যন অব ইণ্ডিয়াৰ সভাপতি তথা অসমৰ মন্ত্ৰী হিমন্ত বিশ্ব শৰ্মাই।
প্ৰতিযোগিতাৰ ছিংগলছ শাখাৰ ফাইনেলত পি কাশ্যপ চীনৰ লী শ্বী ফেঙৰ হাতত পৰাস্ত হয়। ১ ঘণ্টা ১৬ মিনিটজুৰি চলা তিনিটা ছেটৰ কঠিন সংঘৰ্ষৰ অন্তত ফেঙে কাশ্যপক ২২-২০, ১৪-২১, ১৭-২১ৰ ব্যৱধানত পৰাস্ত কৰে। আৰু এইদৰে ৰূপৰ পদকতে সন্তুষ্ট থাকিব লগীয়া হয় কাশ্যপ।
Congratulations @parupallik https://t.co/zXiyfMJn3O
— Himanta Biswa Sarma (@himantabiswa) July 8, 2019
অৰ্জুন বঁটাৰে সন্মানিত তথা কমনৱেল্থ গেইমছৰ প্ৰাক্তন চেম্পিয়ন গৰাকীৰ এই সাফল্যত মন্ত্ৰী শৰ্মাই টুইটাৰৰ জৰিয়তে খেলুৱৈগৰাকীক অভিনন্দন জনায়।
ইফালে ৰূপৰ পদক বিজয়ী কাশ্যপে মেচৰ অন্তত টুইটাৰ জৰিয়তে নিজৰ মনৰ কথা উল্লেখ কৰি ফাইনেলখন ভাল হোৱা বুলি উল্লেখ কৰে। তদুপৰি নিজৰ সৰ্বশ্ৰেষ্ঠ দিবলৈ সক্ষম হোৱা নাই যদিও বিগত এটা সপ্তাহ ভালদৰে যোৱা বুলিও মন্তব্য কৰে।
উল্লেখ্য যে আঘাতৰ বাবে যোৱা এটা বছৰ বিশেষ সফলতা লাভ কৰিব পৰা নাছিল পি কাশ্যপে। কানাডা অ’পেনৰ পূৰ্বে যোৱা বৰ্ষৰ অষ্ট্ৰেলিয়ান অ’পেনেই আছিল কাশ্যপৰ অন্তিমখন ফাইনেল মেচ।