ব্যক্তিৰ সামগ্ৰিক স্বাস্থ্যৰ বাবে খাদ্যৰ সঠিক ব্যৱস্থাপনা অত্যন্ত প্ৰয়োজনীয়। কিছুমান খাদ্যৰ সংমিশ্ৰণে পুষ্টিকৰ পদাৰ্থ শোষণত সহায় কৰি ইটোৱে সিটোক পৰিপূৰক কৰি তোলে।
কিন্তু এনে কিছুমান খাদ্য আছে, যিবোৰ খাদ্যৰ সংমিশ্ৰণে দেহত কিছু সমস্যাৰো সৃষ্টি কৰে। এগৰাকী পৰিচিত পুষ্টিবিদ নমামী আগৰৱালাই এক ভিডিঅ’যোগে এই বিষয়ে প্ৰকাশ কৰিছে।
তেওঁ এনে তিনিটা খাদ্যৰ সংমিশ্ৰণৰ বিষয়ে ভিডিঅ’টোত উল্লেখ কৰিছে, যিসমূহ খাদ্য মিহলাই খোৱাৰ পৰা পৰাপক্ষত আঁতৰি থাকিব লাগে। এই বিষয়ে জানো আহকঃ
১/ গাখীৰ আৰু কলঃ
বহুলোকে সাধাৰণতে ব্ৰেকফাষ্টত গাখীৰ আৰু কল একেলগে খায়। কিন্তু গাখীৰ আৰু কল একেসময়তে খালে ভালদৰে হজম নহ’বও পাৰে। পুষ্টিবিদগৰাকীয়ে উল্লেখ কৰা মতে গাখীৰ আৰু কল খোৱাৰ পিছত পাচনতন্ত্ৰৰ সমস্যাৰ সন্মুখীন হ’ব পাৰে।
২/ গধূৰ খাদ্যৰ লগত ফল-মূলঃ
ফল-মূল স্বাস্থ্যকৰ আৰু অতি পুষ্টিকৰ। কিন্তু ইয়াৰ সুফল লাভ কৰিবলৈ সঠিক সময়ত সেৱন কৰিব লাগিব। ফল-মূল কম সময়ৰ ভিতৰতে হজম হয় যদিও গধূৰ খাদ্য হজম হ’বলৈ কিছু সময়ৰ প্ৰয়োজন হয়। সেয়ে গধূৰ খাদ্যৰ লগত ফল-মূল একেলগে খালে পেট ফুলা আৰু গেছৰ সমস্যা হয়।
৩/ মাছ আৰু দৈঃ
দৈৰ সৈতে মাছ দেহৰ বাবে সঠিক নহয় বুলি পুষ্টিবিদগৰাকীয়ে উল্লেখ কৰিছে। মাছত যথেষ্ট প্ৰটিন থাকে আৰু সেয়ে দৈৰ সৈতে মিহলাই খালে পাচনতন্ত্ৰৰ ওপৰত গধুৰ বোজা হ’ব পাৰে। পুষ্টিবিদগৰাকীৰ মতে এই সংমিশ্ৰণে ছালৰ সমস্যা আৰু এলাৰ্জীৰ সৃষ্টি কৰিব পাৰে।
