এন আৰ চি কেন্দ্ৰিক ভীতিৰ বাবে ভাৰতৰ পৰা কিছুমান লোক সীমান্তইদি বাংলাদেশত প্ৰৱেশ কৰাৰ কেইবাটাও ঘটনাৰ পিছতে দেশখনে ইয়াৰ সীমান্তৰ পহৰা অধিক কটকটীয়া কৰাৰ সিদ্ধান্ত লৈছে।
সীমান্তৰ পহৰা বৃদ্ধি কৰিবলৈ দেশখনৰ পৰৰাষ্ট্ৰ মন্ত্ৰ্যালয়ে স্বৰাষ্ট্ৰ মন্ত্ৰ্যালয়ক চিঠিৰে জনাইছে বুলি পৰৰাষ্ট্ৰ মন্ত্ৰী ড০ এ কে আব্দুল মোমেনৰ উদ্ধৃতিসহ বিবিচি বাংলাত বাতৰি প্ৰকাশ।
বাতৰিটোত কোৱা হৈছে যে যোৱা কিছু দিনত ভাৰতৰ পৰা দেশখনত নথি-পত্ৰবিহীনভাৱে অবৈধ নাগৰিকৰ প্ৰৱেশৰ কেইবাটাও ঘটনা ঘটিছে আৰু ইয়াৰ পৰিপ্ৰেক্ষিতত এনে সিদ্ধান্ত লোৱা হৈছে। এইবোৰ ঘটনা ঘটিছে বিশেষকৈ ঝিনাইদহ আৰু ৰাজচাহী সীমান্তত।
“কাগজপত্ৰ নথকা কোনো লোক যাতে বাংলাদেশত প্ৰৱেশ কৰিব নোৱাৰে তাৰ বাবে সীমান্তত পহৰা বৃদ্ধিৰ বাবে পৰৰাষ্ট্ৰ মন্ত্ৰ্যালয়ে স্বৰাষ্ট্ৰ মন্ত্ৰ্যালয়ক চিঠি দিছে”, বিবিচি বাংলাত ড০ এ কে আব্দুল মোমেনৰ উদ্ধৃতি।
মন্ত্ৰীজনে কয়, “আমাৰ সীমান্ত সকলো সময়তে কটকটীয়া সুৰক্ষাত আছে। বিদেশলৈ যোৱা কিছুমান লোক ঘূৰি আহিছে বুলি সংবাদ মাধ্যমৰ পৰা জানিব পৰা গৈছে। ইয়াৰ মাজত যিসকল বাংলাদেশৰ নাগৰিক আছে, তেওঁলোকক আমি গ্ৰহণ কৰিম। কিন্তু অন্য নাগৰিক হ’লে গ্ৰহণ নকৰিম।”
মন্ত্ৰীজনে সংবাদ প্ৰতিষ্ঠানটোৰ আগত কয়, অনুপ্ৰৱেশৰ বিভিন্ন খবৰ প্ৰকাশ হৈ থকা বাবে সীমান্তৰ পহৰা অধিক কটকটীয়া কৰাৰ সিদ্ধান্ত লোৱা হৈছে। স্বৰাষ্ট্ৰ মন্ত্ৰ্যালয়ৰ কৰ্মকৰ্তাই সীমান্তত পহৰা বৃদ্ধি কৰা বুলি অৱগত কৰিছে।
আনহাতে এন আৰ চি কেন্দ্ৰিক শংকাৰ বিষয়টোত ভাৰতৰ নেতৃবৰ্গৰ সৈতে আলোচনা হোৱা আৰু আশ্বাস পোৱা বুলি দাবী কৰি মন্ত্ৰীজনে কয়, “এই বিষয়ত অনেক আলোচনা হৈছে। ভাৰত চৰকাৰে আমাক বাৰে বাৰে প্ৰতিশ্ৰুতি দিছে যে এই বিষয়টোৱে বাংলাদেশক কোনো প্ৰকাৰেই প্ৰভাৱিত নকৰে। এন আৰ চি তেওঁলোকৰ অভ্যন্তৰীণ বিষয়”, সংবাদ প্ৰতিষ্ঠানটোত মন্ত্ৰীজনৰ বক্তব্য। তেওঁ বাংলাদেশে ভাৰত চৰকাৰৰ ওপৰত বিশ্বাস ৰাখে বুলিও দাবী কৰে।
উল্লেখ কৰিব পাৰি যে যোৱা দুমাহৰ ভিতৰত ভাৰতৰ পৰা বাংলাদেশত প্ৰৱেশ কৰাৰ চেষ্টা কৰোঁতে বহুকেইজন লোক ধৰা পৰিছে।
একেবাৰে শেহতীয়া এটা ঘটনাত যোৱা ৫ ডিচেম্বৰত ঝিনাইদ জিলাৰ মহেশপুৰ সীমান্তত ১০/১২ লোক ধৰা পৰিছে।
ইয়াৰ পূৰ্বে ২৩ নৱেম্বৰতো অনুপ্ৰৱেশৰ চেষ্টা চলোৱা ২২জন লোকক বি জি বিয়ে আটক কৰে।
বি জি বিক এই অনুপ্ৰৱেশ ধৰা পেলোৱাত সহায় কৰিবলৈ সীমান্তৰ ঠায়ে ঠায়ে স্থানীয় লোকৰ একোখন কমিটীও গঠন কৰি দিয়া হৈছে বুলি বাতৰিটোত প্ৰকাশ।
বাংলাদেশৰ পৰা ভাৰতলৈ অহৰহ অনুপ্ৰৱেশ হৈ থকা বুলি দাবী কৰি ভাৰতৰ, বিশেষকৈ অসমৰ বিভিন্ন দল-সংগঠনে ভাৰত-বাংলাদেশ সীমান্ত সম্পূৰ্ণৰূপে ছীল কৰাৰ দাবী তুলি অহাৰ সময়তে এই ওলোটা সোঁতক বাধা দিয়াৰ বাংলাদেশৰ কৌশল তাৎপৰ্য্যপূৰ্ণ।
ইয়াৰ ফলত ভাৰতৰ পাৰে থকা অবৈধ তথা এন আৰ চিৰ পৰা বাদ পৰি ডিটেনশ্যন কেম্পত সোমোৱাৰ শংকাত থকা বাংলাদেশীসকল ইচ্ছা কৰিলেও ঘূৰি যোৱাৰ পথ মসৃণ নহ’ব।
