স্বামীৰ সৈতে একেলগে জীৱন কটোৱাৰ উদ্দেশ্যে ভাৰতলৈ আহি বিপদত পৰিছে এগৰাকী বাংলাদেশী মহিলা। দিকবিদিক হেৰুৱাই উপায়বিহীন হৈ এতিয়া মহিলাগৰাকী আৰক্ষীৰ কাষ চাপিবলৈ বাধ্য হৈছে। এই ঘটনা সংঘটিত হৈছে নয়ডাত।
প্ৰকাশিত খবৰ অনুসৰি, ২০১৭ চনত ভাৰতীয় ব্যক্তিগৰাকীৰ সৈতে বিবাহপাশত আবদ্ধ হৈছিল বাংলাদেশী মহিলাগৰাকী। মহিলাগৰাকীৰ নাম সন্যা আখতাৰ। আনহাতে তেওঁৰ ভাৰতীয় স্বামীৰ নাম সৌৰভ কান্ত তিৱাৰী।
কৰ্মসূত্ৰে ২০১৭ চনৰ পৰা ২০২১ চনলৈ বাংলাদেশত আছিল তিৱাৰী। তেতিয়াই সন্যাৰ সৈতে বিবাহ কৰাইছিল তিৱাৰীয়ে। তেওঁলোকৰ এই বিবাহৰ চিন স্বৰূপে জন্ম হয় এটি সন্তানৰো।
বৰ্তমান প্ৰায় ডেৰ বছৰীয়া এই সন্তানক লৈ সন্যা শেহতীয়াকৈ স্বামীৰ লগত জীৱন কটোৱাৰ উদ্দেশ্যে ভাৰতলৈ আহে। পিছে নয়ডাস্থিত স্বামীগৃহত উপস্থিত হৈ বিপাঙত পৰে মহিলাগৰাকী।
সন্যাই নয়ডাত উপস্থিত হৈ জানিব পাৰে, তেওঁৰ স্বামীয়ে আন এগৰাকী মহিলাৰ সৈতে ইতিপূৰ্বে সংসাৰ তৰিছে আৰু সন্যাৰ সৈতে বৈবাহিক সম্পৰ্ক অব্যাহত ৰাখিব নিবিচাৰে।
ইয়াৰ প্ৰতিক্ৰিয়া স্বৰূপে সন্যাই স্বামী তিৱাৰীৰ প্ৰতাৰণাৰ বিৰুদ্ধে মহিলা থানাত এজাহাৰ দাখিল কৰে। সন্যাৰ অভিযোগৰ ভিত্তিত সম্প্ৰতি আৰক্ষীয়ে তদন্ত অব্যাহত ৰাখিছে।
