নিষিদ্ধ আলফাই প্ৰফুল্ল কুমাৰ মহন্তৰ প্ৰথম চৰকাৰৰ শেষ সময়চোৱাত আৰু অপাৰেচন বজৰং আৰম্ভ হোৱাৰ পূৰ্বে ঢাকাত ব্ৰিটিছ কূটনীতিকৰ সহায় বিচাৰিছিল।
ইউ কেৰ সহায় বিচাৰি আলফাৰ তিনি শীৰ্ষ নেতাই ঢাকাত এজন ব্ৰিটিছ কূটনীতিকক সাক্ষাৎ কৰিছিল।
ইউ কেৰ জাতীয় আৰ্কাইভৰ শেহতীয়াকৈ অবৰ্গীকৃত নথিৰ উল্লেখেৰে এই বাতৰি প্ৰকাশিত হৈছে।
১৯৯০ চনৰ ২ অক্তোবৰত আলফাৰ সাধাৰণ সম্পাদক অনুপ চেতিয়া, প্ৰচাৰ সম্পাদক সিদ্ধাৰ্থ ফুকন আৰু ইকবালে কূটনীতিক ডেভিড অষ্টিনক সাক্ষাৎ কৰিছিল।
অষ্টিনে ৪ অক্তোবৰত লণ্ডনৰ মুখ্য কাৰ্য্যালয়লৈ লিখা এটা টোকাত লিখিছিল যে “আলফাৰ প্ৰেৰণা হৈছে ইজৰাইল”।
“লোক তিনিজনে চাৰিটা পৃথক এলেকাত সহায়/ পৰামৰ্শ বিচাৰিছিল—আলফাৰ কাৰ্য্যকলাপ আৰু লক্ষ্যৰ প্ৰচাৰত ইউকেৰ সহায়; ইউকেত কাৰ্য্যালয় খুলিবলৈ আলফা সমৰ্থ হ’ব নেকি সেই সন্দৰ্ভত পৰামৰ্শ; ঢাকাৰ আন পশ্চিমীয়া কূটনৈতিক মিছনসমূহৰ সৈতে পৰিচয় কৰাই দিয়া; আৰু তেওঁলোকক সহায় কৰিব পৰা ইজৰাইলৰ কৰ্তৃপক্ষৰ সৈতে কেনেকৈ যোগাযোগ কৰিব পাৰি,” অষ্টিনে লিখিছিল।
আলফাৰ প্ৰচাৰৰ প্ৰচেষ্টাক অষ্টিনে নতুন ধৰণৰ বুলিও উল্লেখ কৰিছিল, কিন্তু আলফাৰ শিৱিৰ পৰিদৰ্শন কৰিবলৈ দিয়া নিমন্ত্ৰণ প্ৰত্যাখ্যান কৰিছিল।
অষ্টিনৰ টোকাত আলফাৰ চীনা সংযোগৰ বিষয়েও উল্লেখ আছিল।
নতুন দিল্লীৰ ব্ৰিটিছ হাই কমিছনৰ কূটনীতিক ডি ডি ডব্লিউ মাৰ্টিনে ৫ নৱেম্বৰত ইয়াক নতুন আৰু কৌতূহলদ্দীপক বুলি উল্লেখ কৰিছিল।
