বৰপেটা জিলাৰ ছুটীয়াপাৰা গাঁৱৰ নৱনিৰ্মিত কীৰ্তনঘৰটো আজি আনুষ্ঠানিকভাৱে উদ্বোধন কৰে বৰপেটা সত্ৰৰ বুঢ়াসত্ৰীয়া বশিষ্ট শৰ্মাই৷ সম্পূৰ্ণ সত্ৰীয়া ৰীতি-নীতিৰে ৰাজহুৱা কীৰ্তনঘৰটো উদ্বোধন কৰাৰ পিছতে বুঢ়া সত্ৰীয়া গৰাকীয়ে ছুটীয়াপাৰা গাঁৱৰ ভক্তপ্ৰাণ ৰাইজৰ উপস্থিতিত কীৰ্ত্তনঘৰটোৰ ভিতৰত খোল, তাল, হৰিধ্বনিৰে গুৰু আসন প্ৰতিষ্ঠা কৰে৷
এই অনুষ্ঠানৰ পাছতে মনহৰি পাঠকৰ সভাপতিত্বত “সমাজ ব্যৱস্থাত নামঘৰৰ ভুমিকা” শীৰ্ষক এখন ধৰ্মালোচনা সভা অনুষ্ঠিত হয়৷ সভাখনত বিশিষ্ট অতিথি হিচাপে অংশগ্ৰহণ কৰে বিশিষ্ট সাহিত্যিক অক্ষয় কুমাৰ মিশ্ৰ, পাটবাউসী সত্ৰ পৰিচালনা সমিতিৰ সভাপতি ভবেন পাঠক, বাউসী অঞ্চলৰ বিশিষ্ট সমাজ কৰ্মী গুণজিৎ অধিকাৰী, বাউসী ভাগৱত অধ্যয়ন চক্ৰৰ সম্পাদক জগৎ বায়ন, গোপাল পাঠকৰ লগতে বহুতো বিশিষ্ট ব্যক্তি৷
ধৰ্মালোচনা সভাত ভাষণ প্ৰদান কৰি বিশিষ্ট সাহিত্যিক অক্ষয় কুমাৰ মিশ্ৰই কয় যে, নামঘৰ একোখন সমাজৰ শান্তি সম্প্ৰীতি আৰু সমন্বয়ৰ প্ৰতীক৷ তেওঁ লগতে কয়- ‘ব্যক্তি জীৱন আৰু সমাজ জীৱনৰ বিভিন্নমুখী মংগলজনক কথা কাৰ্যৰ কেন্দ্ৰস্বৰূপ হৈছে নামঘৰ৷
অনুষ্ঠানত বৰপেটা সমষ্টিৰ বিধায়ক গুণীন্দ্ৰ নাথ দাসো উপস্থিত থাকে৷ আনহাতে সন্ধিয়া বিশিষ্ট ব্যক্তি ৰবীন্দ্ৰ নাথ পাঠকে সমুহীয়া বন্তি প্ৰজ্বলন কাৰ্যসূচীৰ শুভাৰম্ভ কৰে৷
