ক্ৰমাগত দ্বিতীয়বাৰৰ বাবে ভাৰতীয় ক্ৰিকেট দলে অষ্ট্ৰেলিয়াৰ মাটিত টেষ্ট শৃংখলা জয়ী হৈ ইতিহাস ৰচিবলৈ সক্ষম হৈছে।
অষ্ট্ৰেলিয়াৰ বিৰুদ্ধে বৰ্ডাৰ-গাভাস্কাৰ ট্ৰফিত একেৰাহে দ্বিতীয়বাৰৰ বাবে ২-১ৰ ব্যৱধানত টেষ্ট শৃংখলা জয়ী হয় ভাৰত।
ব্ৰীছবেনত খেলা শৃংখলাৰ অন্তিমখন মেচত উইকেটকীপাৰ বেটছমেন ঋষভ পণ্টৰ অপৰাজিত ৮৯ৰানৰ ইনিংছৰ সহায়ত ভাৰতে মেচখন ৩ উইকেটত জয়লাভ কৰে।
এই ঐতিহাসিক বিজয়ৰ পিছতেই বিচিচিআইয়ে ভাৰতীয় ক্ৰিকেট দললৈ ৫ কোটি টকাৰ পুৰস্কাৰ ঘোষণা কৰে।
বিচিচিআইৰ সচিব জয় শ্বাহে এটা টুইট কৰি এই কথা জনায়। এই জয় ভাৰতীয় ক্ৰিকেটৰ বাবে স্মৰণীয় বুলি মন্তব্য কৰি দলটোক বানচ হিচাপে ৫ কোটি টকা দিয়াৰ কথা ঘোষণা কৰে শ্বাহে।
চাৰিখনীয়া টেষ্ট মেচৰ শৃংখলাৰ অন্তিমখন মেচৰ অন্তিম দিনা ভাৰতীয় দলে ৩২৮ ৰানৰ লক্ষ্য পিছা কৰি ব্ৰীছবেনত ঐতিহাসিক বিজয় সাব্যস্ত কৰে।
১৯৮৮ চনৰ পাছৰে পৰা ব্ৰীছবেনত অষ্ট্ৰেলিয়াই কোনো টেষ্টত পৰাজিত হোৱা নাছিল। ভাৰতেও ইয়াৰ পূৰ্বে গাব্বাত কোনো টেষ্টত জয়লাভ কৰা নাছিল।
অজিংকা ৰাহানেৰ নেতৃত্বত টীম ইণ্ডিয়াই ইতিহাস সলনি কৰি দিলে। গাব্বাত অষ্ট্ৰেলিয়াৰ দুৰ্গত মোক্ষম আঘাত হানি শৃংখলা জয় কৰিলে ভাৰতে।
ইয়াৰ পূৰ্বে ব্ৰীছবেনত কোনো দলে ইমান ডাঙৰ লক্ষ্য অতিক্ৰম কৰিব পৰা নাছিল।
উল্লেখ্য যে, এডিলেইডত অনুষ্ঠিত প্ৰথম মেচত ৮ উইকেটত পৰাস্ত হৈছিল ভাৰত। ইয়াৰ পিছত মেলবৰ্ণত অনুষ্ঠিত দ্বিতীয়খন মেচত ভাৰতে সুন্দৰভাৱে প্ৰত্যাৱৰ্তন কৰি ৮ উইকেটত মেচখন জয়ী হৈ শৃংখলাত ১-১ৰ সমতা স্থাপন কৰে।
ছিডনীত অনুষ্ঠিত হোৱা শৃংখলাৰ তৃতীয়খন মেচ ড্ৰ হৈছিল। কিন্তু ব্ৰীছবেনত অনুষ্ঠিত নিৰ্ণায়ক মেচখনত ভাৰতে ৩ উইকেটত জয় লাভ কৰি শৃংখলা ২-১ত দখল কৰে।
