দেশত বৰ্তমান আইপিএলৰ উন্মাদনা চলি আছে।
সেইসময়তে ভাৰতীয় ক্ৰিকেট বোৰ্ড বিচিচিআইয়ে ক্ৰিকেটাৰসকলৰ স’তে চলিত বৰ্ষৰ বাৰ্ষিক চুক্তিৰ তালিকাখনি প্ৰকাশ কৰিছে।
এই বৰ্ষত মুঠ ২৮জন ক্ৰিকেটাৰক তালিকাখনত অন্তৰ্ভূক্ত কৰা হৈছে।
আটাইকেওজন ক্ৰিকেটাৰকে চাৰিটাকৈ গ্ৰেডৰ দ্বাৰা ভাগ কৰা হৈছে।
বিচিচিআইয়ে জনাইছে যে, তালিকাখনৰ সৰ্বোচ্চ গ্ৰেড এ প্লাছত (A+) তিনিজন ক্ৰিকেটাৰক ৰখা হৈছে।
তেওঁলোক হৈছে- অধিনায়ক বিৰাট কোহলী, সহঃ অধিনায়ক ৰোহিত শৰ্মা আৰু ফাষ্ট বলাৰ যশপ্ৰীত বুমৰাহ।
তেওঁলোকে বছৰি সাত কোটি টকা বোৰ্ডৰ পৰা লাভ কৰিব।
এ প্লাছৰ পৰৱৰ্তী গ্ৰেড এ (A)-ত স্থান লাভ কৰিছে দহজন ক্ৰিকেটাৰে।
তেওঁলোক হৈছে- অপেনাৰ শিখৰ ধাৱান, টেষ্ট অধিনায়ক আজিংক্য ৰাহানে, স্পীনাৰ ৰবিচন্দ্ৰন অশ্বিন, অলৰাউণ্ডাৰ ৰবীন্দ্ৰ জাদেজা, বেটছমেন চেতেশ্বৰ পূজাৰা, ফাষ্ট বলাৰ ইশান্ত শৰ্মা, উইকেটকীপাৰ ঋষভ পণ্ট, বেটছমেন কে এল ৰাহুল, অলৰাউণ্ডাৰ হাৰ্ডিক পাণ্ডিয়া আৰু ফাষ্ট বলাৰ মহম্মদ ছামি।
এওঁলোকে প্ৰত্যেকেই বছৰি পাঁচ কোটি টকা লাভ কৰে।
উল্লেখযোগ্য যে প্ৰথমবাৰৰ বাবে অলৰাউণ্ডাৰ হাৰ্ডিক পাণ্ডিয়াই বি গ্ৰেডৰ এ গ্ৰেডত স্থানত লাভ কৰিবলৈ সক্ষম হৈছে।
আনহাতে, পাণ্ডিয়াৰ বিপৰীতে এ গ্ৰেডৰ পৰা পৰৱৰ্তী বি (B) গ্ৰেডলৈ অৱনমিত হৈছে ফাষ্ট বলাৰ ভুৱনেশ্বৰ কুমাৰ।
ভুৱনেশ্বৰ স’তে বি গ্ৰেডত স্থান লাভ কৰিছে মুঠ পাঁচজন ক্ৰিকেটাৰে।
তেওঁলোক হৈছে- ফাষ্ট বলাৰ উমেশ যাদৱ, ছাৰদুল ঠাকুৰ, অপেনাৰ মায়াংক আগৰৱাল, উইকেট কীপাৰ ঋদ্ধিমান সাহা।
এওঁলোকে বছৰি তিনি কোটি টকা লাভ কৰিব।
অন্তিম গ্ৰেড চি (C)-ত অন্তৰ্ভূক্ত হৈছে স্পীনাৰ কুলদীপ যাদৱ, যুজবেন্দ্ৰ চাহাল, নৱদীপ সাইনি।
তেওঁলোকে বছৰি এক কোটিকৈ লাভ কৰিব।
আনহাতে, বোৰ্ডৰ এই তালিকাৰ পৰা মনীশ পাণ্ডে আৰু কেদাৰ যাদৱ বাদ পৰিছে।