পোহৰলৈ আহিছে শিশু ধৰ্ষণৰ আন এক জঘন্য কাণ্ড। এই ঘটনা ঘটিছে ভাৰত-নেপাল সীমান্তৰ সমীপৱৰ্তী পশ্চিম বংগৰ দাৰ্জিলিং জিলাত।
অভিযোগ অনুসৰি, প্ৰায় এমাহ ধৰি এগৰাকী ৬৮ বছৰীয়া বৃদ্ধৰ ধৰ্ষণৰ বলি হৈছে পঞ্চম শ্ৰেণীত অধ্যয়নৰত পঞ্চম শ্ৰেণীৰ এগৰাকী কন্যা শিশু।
ছাত্ৰীগৰাকীয়ে ধাৰাবাহিকভাৱে চলা এই নিৰ্যাতনৰ বিষয়ে মাতৃক বৰ্ণনা কৰাৰ পিছতে সোমবাৰে মাতৃয়ে এফআইআৰ দাখিল কৰে।
এই সন্দৰ্ভত আৰক্ষীয়ে সদৰী কৰা মতে, শিশুটি ঘৰত অকলে থকাৰ সময়তে এই ঘটনা সংঘটিত হৈছিল বুলি শিশুটিৰ মাতৃয়ে এজাহাৰত উল্লেখ কৰিছে।
অভিযুক্ত চুবুৰীয়া বৃদ্ধগৰাকীয়ে এই জঘন্য কাণ্ড সংঘটিত কৰাৰ পিছত প্ৰতিবাৰেই শিশুটিক ১০ টকাকৈ দিছিল বুলি জানিব পৰা গৈছে।
লগতে ধৰ্ষণৰ বিষয়ে যিকোনো ব্যক্তিৰ আগত প্ৰকাশ কৰিলে ডিঙি চেপি হত্যা কৰাৰ ভাবুকি দিয়া বুলিও এজাহাৰত উল্লেখ কৰা হৈছে।
শিশুটিৰ মাতৃৰ এই অভিযোগৰ ভিত্তিত আৰক্ষীয়ে অভিযুক্তক গ্ৰেপ্তাৰ কৰি POCSO আইনৰ অধীনত গোচৰ ৰুজু কৰিছে।
আনহাতে ভুক্তভোগী শিশুটিক চিকিৎসা পৰীক্ষাৰ বাবে চিকিৎসালয়লৈ প্ৰেৰণ কৰা বুলি জানিবলৈ দি আৰক্ষীয়ে লগতে তদন্ত অব্যাহত আছে বুলি সদৰী কৰে।
