শিৱসাগৰৰ ৰূপৰেখা বৰুৱাৰ লগতে ৩০ গৰাকী সাংস্কৃতিক কৰ্মীলৈ ‘ভাৰতৰত্ন ড০ ভূপেন হাজৰিকা বৰলুইত এৱাৰ্ড ২০২০
দিহা নামৰ লগতে অন্যান্য লোকসংগীতৰ চৰ্চা কৰি থকা শিৱসাগৰ জিলাৰ কোঁৱৰবাৰীচোৱা গাঁৱৰ ৰূপৰেখা বৰুৱালৈ আগবঢ়োৱা হৈছে পঞ্চম সংখ্যক ভাৰতৰত্ন ড০ ভূপেন হাজৰিকা বৰলুইত এৱাৰ্ড ২০২০।
তেওঁৰ লগতে সমাজৰ অন্যান্য ক্ষেত্ৰৰ লগতে সাংস্কৃতিক ক্ষেত্ৰৰ সৈতে জৰিত মুঠ ৩০ গৰাকী সাংস্কৃতিক কৰ্মীলৈ আগবঢ়োৱা হৈছে এই সন্মান।
গুৱাহাটী প্ৰেছ ক্লাৱত অনুষ্ঠিত হোৱা বঁটা বিতৰণী অনুষ্ঠানত তেওঁলোকক বঁটা প্ৰদান কৰে মাজুলী দক্ষিণপাট সত্ৰৰ সত্ৰাধিকাৰ জনাৰ্দন দেৱ গোস্বামী, সংগীত শিল্পী মনীষা হাজৰিকা আৰু মঞ্জুলা হাজৰিকাই।
সদৌ অসম সাংস্কৃতিক সমন্বয় সন্থা চমুকৈ ‘আকু’ৱে এই সন্মান আগবঢ়ায় সাংস্কৃতিক কৰ্মীসকললৈ।
উল্লেখযোগ্য যে, ৰং চেনেলৰ সদৌ অসম ভিত্তিত আয়োজিত দিহা নাম প্ৰতিযোগিতাত ৰূপৰেখাৰ নেতৃত্বত জয়াদলং মহিলা সমাজে শ্ৰেষ্ঠ দলৰ সন্মান লাভ কৰাৰ লগতে ৰূপৰেখা বৰুৱাই শ্ৰেষ্ঠ নামতিৰ খিতাপ অৰ্জন কৰিছিল।
ইয়াৰোপৰি, জিলা পৰ্যায়ত অনুষ্ঠিত বহুকেইটা প্ৰতিযোগিতাত ৰূপৰেখা বৰুৱাৰ দিহা নামৰ দলটোৱে শ্ৰেষ্ঠ দলৰ খিতাপ দখল কৰিবলৈ সক্ষম হৈছিল।
ৰাজ্যিক পৰ্যায়ত এই সন্মান লাভ কৰি যথেষ্ট আনন্দিত ৰূপৰেখা বৰুৱা।
নৰ্থ ইষ্ট নাওৰ সাংবাদিকৰ আগত প্ৰতিক্ৰিয়া প্ৰকাশ কৰি বৰুৱাই কয় ‘মই দিহা নামৰ লগতে লোকসংগীতৰ লগতো জড়িত। মোৰ দেউতাও লোকসংগীতৰ সৈতে জড়িত আছিল। দেউতাৰ বহু আশা তথা সপোন ৰৈ গৈছিল। গতিকে দেউতাৰ মনৰ যি আশা সেয়া মই পূৰণ কৰাৰ বাবে চেষ্টা কৰি যাম। ভৱিষ্যতলৈ দিহা নামৰ লগতে লোকসংগীতৰ ক্ষেত্ৰখনৰ লগত নিজকে জড়িত ৰাখি আগুৱাই যাবলৈ চেষ্টা কৰিম।‘
ইপিনে, আজিৰ দিনটোতে উক্ত অনুষ্ঠানৰ লগতে ১২ সংখ্যক নেৱক’ছ মেডিয়া এৱাৰ্ড অনুষ্ঠানো অনুষ্ঠিত হোৱাৰ উপৰিও ইমানুৱেল নামৰ চলচ্চিত্ৰখন শুভ মুহুৰত অনুষ্ঠিত হয়।