বিধায়িকা সুমন হৰিপ্ৰিয়াৰ কামৰ নমুনা: হাজোৰ গুদামত বছৰ বছৰ ধৰি পৰি ৰৈছে চৰ উন্নয়ন বিভাগৰ চাইকেল-চিলাই মেচিন
চৰ উন্নয়ন বিভাগৰ নিষ্ক্ৰিয়তা, হাজোৰ বিধায়িকা সুমন হৰিপ্ৰিয়াৰ দায়িত্বহীনতাৰ বাবেই হাজোৰ উন্নয়ন খণ্ডৰ গুদামতে পৰি ৰৈছে প্ৰাক্তন মুখ্যমন্ত্ৰীৰ ফটো সম্বলিত চৰকাৰী চাইকেল, চিলাই মেচিনকে ধৰি বহু সামগ্ৰী।
চৰ উন্নয়নৰ নামত অহা কেইবালাখ টকা মূল্যৰ সা-সামগ্ৰী বিতৰণৰ অভাৱত হাজোৰ উন্নয়ন খণ্ডৰ কেইটামান জৰাজীৰ্ণ আৱাসত পৰিত্যক্ত হৈ থকাত এতিয়া মামৰে ধৰিবলৈ আৰম্ভ কৰিছে সেই সামগ্ৰীবোৰত ।
ইয়াৰ ভিতৰত চৰ এলেকাধীন বিদ্যালয়ৰ দৰিদ্ৰ ছাত্ৰীৰ বাবে অনা ২৫০ খন বাইচাইকেল, মহিলা সকলৰ বাবে অনা ৫০ টা চিলাই মেচিন আৰু চৰ পোহৰাবলৈ অনা ১০০ টা চলাৰ লাইট আছে।
জৰাজীৰ্ণ ঘৰত পেলাই থোৱা বাবে প্ৰতিবিধ সামগ্ৰী এতিয়া মামৰে ধৰি ব্যৱহাৰৰ অনুপযোগী হৈ পৰিছে ।
বছৰ-বছৰ ধৰি এনেদৰে সামগ্ৰী সমূহ পৰিত্যক্ত হৈ থকাত বুজন পৰিমাণৰ চৰকাৰী ধনৰ অপচয় হৈছে ।
এই সামগ্ৰীবোৰৰ দায়িত্বত থকা কৰ্মচাৰী গৰাকীৰ মতে একমাত্ৰ হিতাধিকাৰীৰ তালিকাখন প্ৰস্তত হৈ নুঠাৰ বাবেই সামগ্ৰীসমূহ বিতৰণ কৰিব পৰা নাই ।
এখন তালিকা প্ৰস্তুত কৰাৰ বাবে সংশ্লিষ্ট বিভাগক দুই বছৰতকৈ অধিক সময়ৰ প্ৰয়োজন হোৱাৰ কথাই এতিয়া সকলোৰে চকু থৰ লগাইছে ।
তথাপিও আজিকোপতি তালিকাখন প্ৰস্তুত কৰি উলিয়াব নোৱাৰিলে সংশ্লিষ্ট বিভাগে।
ইয়াকেলৈ চৰবাসীৰ মাজত তীব্ৰ প্ৰতিক্ৰিয়াৰ সৃষ্টি হোৱা পৰিলক্ষিত হৈছে। কথা হ’ল সামগ্ৰীসমূহ বিতৰণৰ ক্ষেত্ৰত বিধায়িকা সুমন হৰিপ্ৰিয়াই কিয় আগভাগ নল’লে?
মাত্ৰ কেইজন মান বিষয়া আৰু বিধায়িকাগৰাকীৰ অমনোযোগিতাৰ বাবেই চৰকাৰৰ লাখ লাখ টকা পানীত নপৰিলনে? সেই ধন ৰাইজৰেই ধন নহয় জানো? এনেবোৰ প্ৰশ্নৰ উত্তৰ এতিয়া বিধায়িকাগৰাকীৰ পৰা ৰাইজে বিচাৰিছে।