বিহাৰৰ শাসকীয় মিত্ৰজোঁট জেডি(ইউ) আৰু বিজেপিৰ মাজত চলি থকা সংঘাতৰ খবৰ পুনৰ এবাৰ চৰ্চালৈ আহিছে। আজি নতুন দিল্লীত অনুষ্ঠিত ৰাষ্ট্ৰপতি দ্ৰৌপদী মুৰ্মুৰ শপত গ্ৰহণ অনুষ্ঠানত বিহাৰৰ মুখ্যমন্ত্ৰী নীতিশ কুমাৰ অনুপস্থিত থকাৰ পিছত বিজেপি আৰু জেডি(ইউ)ৰ মাজত সংঘাতৰ বাতৰি অধিক স্পষ্ট হৈ পৰে।
উল্লেখ্য যে ইয়াৰ পূৰ্বেও বিহাৰৰ মুখ্যমন্ত্ৰী নীতিশ কুমাৰে বিজেপিৰ শীৰ্ষ বিষয়াসকলৰ দ্বাৰা আয়োজিত কেইবাটাও অনুষ্ঠানত ভাগ লোৱাৰ পৰা বিৰত আছিল।
যোৱা ১৭ জুলাইত তেওঁ কেন্দ্ৰীয় গৃহমন্ত্ৰী অমিত শ্বাহে আহ্বান কৰা মুখ্যমন্ত্ৰীসকলৰ এখন বৈঠকৰ পৰা আঁতৰি আছিল।
আনকি শুকুৰবাৰে তেওঁ প্ৰধানমন্ত্ৰী নৰেন্দ্ৰ মোদীয়ে বিদায়ী ৰাষ্ট্ৰপতি ৰামনাথ কোবিন্দৰ বাবে আয়োজন কৰা নৈশ ভোজৰ অনুষ্ঠানো বাদ দিছিল।
আনহাতে নীতিশ কুমাৰৰ অনুপস্থিতি সন্দৰ্ভত ব্যাপক প্ৰতিক্ৰিয়াৰ সৃষ্টি হোৱাৰ পিছতে জনতা দল-ইউনাইটেড সংসদীয় পৰিষদৰ মুৰব্বী উপেন্দ্ৰ কুশৱাহাই ‘মুখ্যমন্ত্ৰীয়ে সকলো অনুষ্ঠানত উপস্থিত থাকিবলৈ বাধ্য নহয়’ বুলি মন্তব্য কৰিছে।
“শপত গ্ৰহণ অনুষ্ঠানলৈ যোৱাটো কেৱল এক আনুষ্ঠানিকতা। প্ৰতিটো অনুষ্ঠানত মুখ্যমন্ত্ৰী গৰাকী উপস্থিত থকাটো প্ৰয়োজনীয় নহয়।”— কুশৱাহাই কয়।
ইফালে ২০২৪ চনত হ’বলগীয়া লোকসভা নিৰ্বাচন পূৰ্বে এক উচ্চ পৰ্যায়ৰ বৈঠকৰ বাবে বিজেপি নেতা অমিত শ্বাহ আৰু জে পি নাড্ডাই শীঘ্ৰেই পাটনা ভ্ৰমণ কৰাৰ সম্ভাৱনা আছে।
বিজেপি নেতাদ্বয়ৰ প্ৰস্তাৱিত ভ্ৰমণ সন্দৰ্ভত প্ৰতিক্ৰিয়া প্ৰকাশ কৰি কুশৱাহাই কয় যে বিহাৰত নীতিশ কুমাৰেই হৈছে আটাইতকৈ ডাঙৰ নেতা।
“আন এটা দলৰ কোনো শীৰ্ষ নেতা বিহাৰলৈ আহিলে আমাৰ বাবে কোনো গুৰুত্ব নাই” বুলিও মন্তব্য কৰিছিল জেডি (ইউ) ৰ নেতাগৰাকীয়ে।
কুশৱাহাৰ এই মন্তব্যই বিহাৰত বিজেপি আৰু জেডি-ইউৰ মাজত যে ৰাজনৈতিক সম্বন্ধত এক সংঘাতপূৰ্ণ পৰিস্থিতি বিৰাজ কৰিছে, তাৰ স্পষ্ট ইঙ্গিত বহন কৰিছে।
