স্বচ্ছ আৰু নিকা প্ৰশাসনৰ লগতে দালাল বিহীন অসম গঢ়িবলৈ সংকল্প গ্ৰহণ কৰা অসমৰ মুখ্যমন্ত্ৰী ড° হিমন্ত বিশ্ব শৰ্মাই গুৱাহাটী উচ্চ ন্যায়ালয়ৰ নিৰ্দেশ অমান্য কৰি একপ্ৰকাৰ লুকাই চুৰকৈ পিছদুৱাৰেৰে ভুৱা ঠিকনাধাৰী কিছুমানক শীৰ্ষ পদত অধিষ্ঠিত কৰি কমতাপুৰ স্বায়ত্ত্বশাসিত পৰিষদৰ অন্তৰ্ৱৰ্তীকালিন পৰিষদৰ শপতগ্ৰহণ কৰোৱাটো দূৰ্ভাগ্যজনক আৰু নিন্দনীয় বুলি মন্তব্য কৰিছে কোচ ৰাজবংশী জাতীয় মহাসভাৰ সাধাৰণ সম্পাদক বিশ্বজিৎ ৰায়ে।
ৰায়ে কয় যে ২০২০ চনৰ ৩ ছেপ্টেম্বৰত অসম বিধানসভাৰ অধিবেশনত কমতাপুৰ স্বায়ত্ত্বশাসিত পৰিষদ বিধেয়ক গৃহীত হোৱাৰ পিছত ২০২১ চনৰ ২৫ ফেব্ৰুৱাৰীত গোপনে কমতাপুৰ স্বায়ত্ত্বশাসিত পৰিষদৰ অন্তৰ্ৱৰ্তীকালিন পৰিষদ গঠন কৰিছিল যদিও পৰিষদ আইন ২০২০ মতে গঠন নোহোৱাত ধুবুৰী জিলাৰ কেইবাজনো ব্যক্তিয়ে অন্তৰ্ৱৰ্তীকালিন পৰিষদৰ বিৰুদ্ধে গুৱাহাটী উচ্চ ন্যায়ালয়ত লেখে আবেদন কৰিছিল আৰু ন্যায়ালয়ে লেখ আবেদনৰ ভিত্তিত অসম চৰকাৰৰ জনজাতি পৰিক্ৰমা বিভাগলৈ পৰিষদৰ কামকাজত স্থিতাৱস্থা ৰাখিবলৈ নিৰ্দেশ দিয়ে ৷
যাৰ বাবে পৰিষদৰ পাৰিষদ সকলে শপত গ্ৰহণ কৰিব পৰা নাছিল।
উক্ত অন্তৰ্ৱৰ্তীকালিন পৰিষদত মোক সদস্য হিচাপে নিযুক্তি দি তদানীন্তন বিত্ত মন্ত্ৰী তথা বৰ্তমানৰ মুখ্যমন্ত্ৰী ড° হিমন্ত বিশ্ব শৰ্মাই চৰম অপমান কৰিছিল আৰু মই তেওঁৰ ৰাজনৈতিক আক্ৰোশৰ বলি হৈছিলোঁ ।
বিশ্বজিৎ ৰায়ে কয় য়ে জয়ন্ত মল্ল বৰুৱাই গুৱাহাটী উচ্চ ন্যায়ালয়ত লেখ আবেদন কৰা সকলোৰে আলোচনাত মিলিত হৈ গোচৰ প্ৰত্যাহাৰ কৰিবলৈ অনুৰোধ কৰিছিত যদিও গুচৰীয়া পক্ষই গোচৰ প্ৰত্যাহাৰ কৰাত সন্মতি দিয়া নাছিল ৷
আনকি উক্ত গোচৰৰ ভিত্তিত যোৱা ১৪ ছেপ্টেম্বৰৰ ভিতৰত গুৱাহাটী উচ্চ ন্যায়ালয়ে পাৰিষদ সকলোক চমন জাৰি কৰিছিল। কিন্তু উক্ত চমনৰ উত্তৰ নিদি অসম চৰকাৰে ২৬ ছেপ্টেম্বৰত মুখ্যমন্ত্ৰীৰ আইনী উপদেষ্টা গৰাকীয়ে গোচৰীয়া পক্ষক গোচৰ প্ৰত্যাহাৰ কৰিবলৈ পুনৰ আহ্বন জনোৱাৰ লগতে সন্ধিয়া খৰ খেদাকৈ ন্যায়ালয়ৰ নিৰ্দেশ অমান্য কৰি চৰকাৰে একপক্ষীয়ভাবে নতুন অধিসূচনা জাৰি কৰি পাৰিষদ সকলোক শপত গ্ৰহণ কৰোৱায়।
এটা জাতিৰ উন্নয়নৰ নামত গঠিত হোৱা পৰিষদৰ পাৰিষদ সকলোক পিছদুৱাৰেদি শপত গ্ৰহণ কৰাতো অসমৰ ৰাজনীতিত এয়াই প্ৰথম। পৰিষদখন ৰাজ্য চৰকাৰে জোৰ জুলুম ভাবে কমতাপুৰবাসীক জাপি দিলেও এই পৰিষদ আইনগতভাৱে অবৈধ আৰু এই পৰিষদক লৈ কোচ ৰাজবংশী সমাজ আনন্দিত নহয়।
বিশ্বজিৎ ৰায়ে ভুৱা ঠিকনাধাৰী সকলোক পৰিষদত অন্তৰ্ভুক্ত কৰাৰ বাবে মুখ্যমন্ত্ৰী ড° হিমন্ত বিশ্ব শৰ্মাই যিমান তৎপৰতা দেখুৱালে একেজন মুখ্যমন্ত্ৰীয়ে জনজাতিকৰণৰ বাবে গঠিত মন্ত্ৰীগোটৰ অধ্যক্ষ হৈ একেই তৎপৰতাৰে কোচ ৰাজবংশী সকলোক কিয় জনজাতিকৰণৰ মৰ্যাদা প্ৰদান নকৰিলে বুলি প্ৰশ্ন কৰে ? বিজেপি চৰকাৰে যোৱা দুটা লোকসভা আৰু অসম বিধানসভাত দিয়া প্ৰতিশ্ৰুতি এতিয়া ধোঁৱা চাঙৰত পৰিণত কৰি কোচ ৰাজবংশী সকলোক চৰমভাবে প্ৰতিৰণা কৰি আহিছে বুলিও তেওঁ কয়।
