আগন্তুক লোকসভা নিৰ্বাচনত উত্তৰ-পূবৰ ২৫খন আসনৰ ২০ খনেই ভাৰতীয় জনতা পাৰ্টী তথা নেডাৰ সহযোগী দলসমূহে দখল কৰিব বুলি বুধবাৰে সংবাদ মাধ্যমৰ আগত দৃঢ়তাৰে মন্তব্য কৰে বিজেপিৰ ৰাষ্ট্ৰীয় সাধাৰণ সম্পাদক ৰাম মাধৱে।
‘বিজেপিয়ে উত্তৰ-পূবত ২০ খন আসনতকৈ কম নাপায়। বিজেপিৰ লগতে নেডাৰ সহযোগী দলসমূহে ২০খনতকৈ বেছি আসনত জয়ী হ’ব’। আগন্তুক নিৰ্বাচন সম্পৰ্কত ত্ৰিপুৰাৰ আগৰতলাত অনুষ্ঠিত হোৱা বিজেপিৰ এখন দলীয় সভাত অংশ লোৱাৰ পাছতে ৰাম মাধৱে এই মন্তব্য কৰে।
ইফালে সহযোগী দল আই পি এফ টিৰ সৈতে আসন বুজাবুজিক লৈ সৃষ্টি হোৱা মতবিৰোধ সন্দৰ্ভত ৰাষ্ট্ৰীয় নেতাগৰাকীয়ে কয়, ‘ত্ৰিপুৰাৰ দুয়োখন আসনৰ বাবেই বিজেপিয়ে প্ৰাৰ্থী ঠিয় কৰোৱাৰ সিদ্ধান্ত লৈছে আৰু এই সন্দৰ্ভত আলোচনা চলি আছে। তেওঁলোকে বিচাৰি থকা পূব আসনখনতো আমাক সহায় তথা সহযোগ কৰিবলৈ আহ্বান জনাম। আমি দলটোৰ সৈতে এই সন্দৰ্ভত কথা পাতিম’।
ইফালে ৰাজ্যখনত বিজেপি-আই পি এফ টিৰ চৰকাৰ গঠন কৰাৰ পাছৰে পৰা ত্ৰিপুৰাত গণতন্ত্ৰ হত্যা হোৱা বুলি চি পি আই এমে কৰা গুৰুতৰ অভিযোগৰ প্ৰত্যুত্তৰত মাধৱে কয়, ‘আমাৰ চৰকাৰ গঠন হোৱাৰ পাছৰ পৰা ৰাজ্যখনত গণতন্ত্ৰ ৰক্ষাহে হৈছে’।
