দুৰ্বৃত্তৰ গুলীচালনাত আহত শিলচৰৰ বৰখলাৰ হাতীচেৰা পঞ্চায়তৰ বিজেপি সভাপতি সুখেন্দু দাসৰ মৃত্যু হৈছে। ১৯ মাৰ্চৰ সন্ধিয়া ৮ বজাত দাসে এটা কাৰ্য্যসূচীৰ পৰা উভতি আহোতে অচিনাক্ত দুৰ্বৃত্তই তেওঁক লক্ষ্য কৰি কেইবাজাঁই গুলীচালনা কৰিছিল।
গুলীচালনাত গুৰুতৰভাৱে আহত পঞ্চায়ত সভাপতিজনক শিলচৰ মেডিকেল কলেজ এণ্ড হস্পিটেললৈ নিয়া হয়। গুৰুতৰভাৱে আহত দাসক লগে লগে আই চি য়ুত ভৰ্তি কৰা হয় যদিও ৰাতিয়ে মৃত্যু হয়। সভাপতি সুখেন্দু দাসৰ লগতে গুলীচালনাত আহত হৈছিল ৰিংকু সেনাপতি নামৰ এজন বিজেপি কৰ্মীও। ৰিংকু সেনাপতি এতিয়াও চিকিৎসাধীন।
ঘটনা সন্দৰ্ভত আৰক্ষীয়ে তদন্ত অব্যাহত ৰাখিছে যদিও কাকো আটক অথবা গ্ৰেপ্তাৰ কৰা নাই। আনকি ঘটনাটোত কোন জড়িত তাৰো ইংগিত দিয়া নাই আৰক্ষীয়ে। “কোনে গুলীয়ালে আৰু কিয় গুলীয়াইছে এই পৰ্য্যন্ত স্পষ্টকৈ একো জানিব পাৰ হোৱা নাই”, ঘটনাটোৰ কেইঘণ্টামানৰ পিছতে কাছাৰৰ আৰক্ষী অধীক্ষক মুগ্ধজ্যোতি মহন্তৰ ভাষ্য।
আনহাতে উধৰবন্দৰ বিধায়ক মিহিৰ সোমেও ঘটনাটোত উদ্বেগ প্ৰকাশ কৰে। তেওঁ ইয়াক নিৰ্বাচনৰ প্ৰাক মুহূৰ্তত অঞ্চলটোত অস্থিৰতা সৃষ্টিৰ চক্ৰান্ত বুলি অভিহিত কৰে।
নিহত দাস যোৱা ডিচেম্বৰত সম্পন্ন পঞ্চায়ত নিৰ্বাচনত হাতীচেৰা পঞ্চায়তৰ সভাপতি পদত নিৰ্বাচিত হৈছিল।
