‘যোৱা ৪০ বছৰৰ ভিতৰত সৰ্বাধিক নিবনুৱা সৃষ্টিৰে মোদী চৰকাৰে অভিলেখ ৰচিলে।’ NSSO য়ে চলোৱা সমীক্ষাৰ তথ্য দাঙি আজি গুৱাহাটীত অনুষ্ঠিত এক সংবাদমেলত কৃষক নেতা অখিল গগৈয়ে কয় যে মোদী চৰকাৰৰ দিনত যোৱা ৫ বছৰত দেশত সৰ্বাধিক ৬.১ শতাংশ লৈ নিবনুৱাৰ সংখ্যা বৃদ্ধি পালে।
গগৈয়ে কয়, ‘প্ৰত্যেক বছৰত ২ কোটি নিবনুৱা সংস্থাপনৰে ৫ বছৰত ১০ কোটি নিবনুৱাক সংস্থাপন দিয়াৰ লক্ষ্য আছিল বিজেপিৰ। কিন্তু যুৱক-যুৱতীলৈ নাহিল ভাল দিন, বৰঞ্চ বৃদ্ধি পালে নিবনুৱা সমস্যা।’
অখিল গগৈয়ে আৰু কয়, ‘মোদী চৰকাৰে NSSOক পৰীক্ষাৰ ফলাফল প্ৰকাশ কৰাত বাধা আৰোপ কৰিছিল। তেতিয়াই ৰাষ্ট্ৰীয় পৰিসংখ্যা আয়োগৰ মুৰব্বী পি চি মহাননে বিভাগটোৰ পৰা পদত্যাগ কৰে। তেওঁৰ পদত্যাগৰ পাছত যোৱা ৩০ জানুৱাৰিত বিজিনেছ ষ্টেণ্ডাৰ্ড নামৰ অৰ্থনৈতিক সংবাদপত্ৰত সেই সমীক্ষা প্ৰকাশ পায়। ১ ফেব্ৰুৱাৰিত নিটি আয়োগে চৰকাৰৰ নিৰ্দেশত সংবাদমেল পাতি উক্ত সমীক্ষা সন্দৰ্ভত নেতিবাচক কথা প্ৰচাৰ কৰে। তাৰ কেইদিনমানৰ পিছতে মহাননে একেখন সংবাদপত্ৰত এটি লেখা লিখি সমীক্ষাটোৰ ফলাফলৰ সত্যতা প্ৰকাশ কৰে।’
আনহাতে বৰ্তমানৰ বিজেপি চৰকাৰে ১ কোটি ২৭ লাখ লোকৰ চাকৰি খাই পেলোৱা বুলি মন্তব্য কৰি গগৈয়ে কয়, ‘মোডীৰ শাসনকালত প্ৰতিটো বিভাগত চাকৰিৰ সংখ্যা হ্ৰাস পাইছে। ২০১৪ চনৰ পৰা ‘১৭ চনলৈ ভাৰতত কেন্দ্ৰীয় চৰকাৰৰ বিভিন্ন বিভাগত ৭৫,০০০টা পদ নাইকিয়া হ’ল। কেন্দ্ৰীয় চৰকাৰৰ অধীনৰ ৰাজহুৱা খণ্ডৰ উদ্যোগ প্ৰতিষ্ঠানত ১ লাখ ৬৭ হাজাৰটা পদ হ্ৰাস পালে। ৰাজহুৱা খণ্ডৰ বেংকত নাইকিয়া হ’ল ৩৫,০০০টা পদ।’
‘মোদীৰ প্ৰতিশ্ৰুতি এতিয়া ভেল্কী বাজিত পৰিণত হৈছে। সেয়ে এতিয়া মোদীয়ে পৰিবৰ্তন আৰু নিবনুৱাক সংস্থাপন দিয়াৰ কথা নকয়। মোদী চৰকাৰৰ বাবে সাম্প্ৰদায়িকতাই মূল ইচ্ছ্যু।’ অখিল গগৈৰ মন্তব্য।
আনহাতে বিজেপিৰ বাবে নিৰ্বাচনী ইস্তাহাৰ প্ৰকাশ কৰাটো গুৰুত্বপূৰ্ণ নহয়, বৰঞ্চ চাৰিওফালে টকা বিলাই দিয়াটোহে তেওঁলোকৰ মূল উদ্দেশ্য বুলি অখিলে অভিযোগ আনে।
বিজেপি কিমান ভুৱা, মিথ্যাচাৰী আৰু ভণ্ড এই কথা মোদী, স্মৃতি ইৰাণী, অমিত শ্বাহ আৰু শেহতীয়াকৈ কুইন ওজাৰ ভুৱা চাৰ্টিফিকেতেই প্ৰমাণ কৰিলে বুলি অখিল গগৈয়ে কয়।
আনহাতে সদৌ অসম ছাত্ৰ সন্থাই তেওঁলোকৰ স্থিতি স্পষ্ট কৰিব লাগে বুলি মন্তব্য কৰি কয় যে সমুজ্জ্বল ভট্টাচাৰ্য্যই গাঁৱে গাঁৱে বিজেপিৰ বিৰুদ্ধে প্ৰচাৰ চলাব বুলি কৈছিল। কিন্তু ইয়াৰ বিপৰীতে ‘এতিয়া তেওঁলোক নিমাত কিয়’ বুলি অখিলে প্ৰশ্ন কৰে।
