ৰাজ্যত লোকসভা নিৰ্বাচনৰ প্ৰথম পৰ্যায়ৰ ভোট গ্ৰহণলৈ মাত্ৰ তিনিটা দিন বাকী থকা অৱস্থাত আজি বিজেপিয়ে ডিব্ৰুগড় লোকসভা সমষ্টিৰ অন্তুৰ্গত ১২৪ নং মাৰ্ঘেৰিটা বিধান সভা সমষ্টিত এক বিশাল বাইক ৰেলী উলিয়াই পঞ্চায়তে পঞ্চায়তে আৰু ৱাৰ্ডে ৱাৰ্ডে নিৰ্বাচনী প্ৰচাৰ চলাই ৰাইজক ৰামেশ্বৰ তেলীক ভোটদান কৰিবলৈ আহ্বান জনায়।
মাৰ্ঘেৰিটা নগৰৰ পৰা ওলোৱা বাইক ৰেলীত দলৰ নেতা ভৱেন শৰ্মা, ভীম কৰ্মকাৰ, ভৱেশ দত্তৰ সৈতে স্থানীয় বিধায়ক ভাস্কৰ শৰ্মাই অংশগ্ৰহণ কৰি ৰাইজৰ দৃষ্টি আকৰ্ষণ কৰে । প্ৰায় এক সহস্ৰাধিক লোকে এই পদযাত্ৰাত অংশ গ্ৰহণ কৰি আকৌ এবাৰ মোডী চৰকাৰ , বিজেপিক ভোট দিয়ক, ৰামেশ্বৰ তেলী জিন্দাবাদ ,ভাস্কৰ শৰ্মা জিন্দাবাদ আদি শ্লগানেৰে আকাশ বতাহ মুখৰিত কৰি তোলে।
আনহাতে, লিডুত থকা কাৰ্যালয়ত আজি শামুকজান গাওঁ পঞ্চায়তৰ ১৫ গৰাকী কংগ্ৰেছ কৰ্মীয়ে বিজেপিত আনুষ্ঠানিক ভাৱে যোগদান কৰাৰ উপৰিও প্ৰতিদিনে মাৰ্ঘেৰিটা বিজেপিৰ কাৰ্যালয়ত বিধায়ক ভাস্কৰ শৰ্মাৰ উপস্থিতত বহু পুৰুষ আৰু মহিলাই বিজেপিত যোগদান কৰি থকা বাতৰি লাভ কৰা হৈছে।
উল্লেখযোগ্য যে, নিৰ্বাচনলৈ মাত্ৰ তিনিটা দিন বাকী থকা অৱস্থাত কংগ্ৰেছ দলৰ নিৰ্বাচনী প্ৰচাৰ এক প্ৰকাৰ শূণ্যত পৰিণত হৈছে। সমষ্টিটোত কংগ্ৰেছ দলে নিলৰ্জ আত্মসমৰ্পণ কৰবলৈ বাধ্য হোৱা বুলি চৌদিশে চৰ্চা চলিছে। কংগ্ৰেছ দলৰ প্ৰাৰ্থী পৱন সিং ঘাটোৱাৰে দুদিন সমষ্টিটোলৈ আহি সৰু সৰু কেইখনমান নিৰ্বাচনী সভাত অংশগ্ৰহণ কৰিয়ে নিৰ্বাচনী প্ৰচাৰ সামৰণি মাৰে ।
গুৰুত্বপূৰ্ণ কথাটো হ’ল মাৰ্ঘেৰিটাৰ কংগ্ৰেছী সমৰ্থকসকলে নিজ সংসদীয় সমষ্টিৰ প্ৰাৰ্থী পৱন সিং ঘাটোৱাৰতকৈ নগাওঁ সংসদীয় সমষ্টিৰ কংগ্ৰেছ দলৰ প্ৰাৰ্থী তথা মাৰ্ঘেৰিটাৰ প্ৰাক্তন বিধায়ক প্ৰদ্যুত বৰদলৈক লৈহে অধিক ব্যস্ত থকা পৰিলক্ষিত হয়। যি সময়ত ৰাজ্যৰ ৰাজনৈতিক দলসমূহৰ কাৰ্যালয়ত যথেষ্ট সমৰ্থক তথা দলীয় নেতৃত্বই ভিৰ কৰি আছে সেই সময়ত মাৰ্ঘেৰিটাৰ কংগ্ৰেছৰ কাৰ্যালয়ত দলীয় কৰ্মী তথা সমৰ্থকৰ সংখ্যা আঙুলিৰ মুৰত লেখিব পৰা ধৰণৰ।
তদুপৰি সমষ্টিটোত বিজেপি বিধায়ক ভাস্কৰ শৰ্মাৰ তৎপৰতাত দলৰ সবল সাংগঠনিক ভেটি থকাৰ পাছতো দুখনকৈ বিশাল নিৰ্বাচনী সভা অনুষ্ঠিত কৰি ষ্টাৰ কেম্পেইনাৰ মুখ্যমন্ত্ৰী সৰ্বানন্দ সোণোৱাল আৰু প্ৰভাৱশালী মন্ত্ৰী ড° হিমন্ত বিশ্ব শৰ্মাৰ দ্বাৰা নিৰ্বাচনী প্ৰচাৰ চলোৱা হয়। ইয়াৰ বিপৰীতে সুদীৰ্ঘ বছৰ কংগ্ৰেছৰ দূৰ্গ হিচাপে পৰিচিত সমষ্টিটোত লোকসভাৰ দৰে গুৰুত্বপূৰ্ণ নিৰ্বাচনৰ প্ৰচাৰৰ ক্ষেত্ৰত তেনেই গুৰুত্ব নিদিয়াটোৱে তাৎপৰ্য বহন কৰিছে।
স্বাভাৱিকতেই দলটোৰ তৃণমূল কৰ্মী সকলৰ মাজত হতাশাৰ সৃষ্টি হৈছে। প্ৰদ্যুত বৰদলৈৰ অনুপষ্ঠিতিত নেতৃত্বৰ অভাৱত ভোগা একাংশ দলীয় কৰ্মীয়ে এইবাৰৰ লোকসভা নিৰ্বাচনত প্ৰায় নিৰ্লিপ্ত হৈয়ে সময় পাৰ কৰা বুলি জানিব পৰা গৈছে ।
আনহাতে, নাগৰিকত্ব সংশোধনী বিধেয়কক কেন্দ্ৰ কৰি সমগ্ৰ ৰাজ্যত বিশাল জনমতৰ সৃষ্টি হৈছিল। ৰাজ্যসভাত বিধেয়কখন উত্থাপন নোহোৱাৰ পাছত জাতীয় সংগঠন সমূহে বিধেয়কখনৰ লগতে বিজেপিৰ বিৰুদ্ধে গাঁৱে গাঁৱে জনমত গঠন কৰিব বুলি ঘোষণা কৰিছিল যদিও মাৰ্ঘেৰিটাত সামান্যৰূপেও এনেধৰণৰ কাৰ্যসূচী অনুষ্ঠিত কৰা পৰিলক্ষিত নহ’ল, যাৰ বাবে সমষ্টিটোত কেবৰ(CAB) প্ৰসংগই ভোটদানৰ ক্ষেত্ৰত বিশেষ প্ৰভাৱ পেলোৱাৰ সম্ভাৱনা নাই।
সমষ্টিটোৰ জলন্ত সমস্যা সমূহৰ ক্ষেত্ৰত সাংসদ হিচাপে তেলীৰ ভূমিকাক লৈ সৰ্বসাধাৰণতো বাদেই একাংশ বিজেপি কৰ্মীও সুখী নহয় বুলি চৰ্চা আছে । কিন্তু সমষ্টিটোত কংগ্ৰেছৰ উদাসীন প্ৰচাৰৰ বিপৰীতে বিধায়ক ভাস্কৰ শৰ্মাই সন্মুখৰ পৰা নেতৃত্ব লৈ চলোৱা চমকপ্ৰদ প্ৰচাৰ আৰু আঢ়ৈ বছৰে ৰূপায়ণ কৰা উন্নয়ণমৃলক আঁচনিৰ সুবাদতে মাৰ্ঘেৰিটা বিধান সভা সমষ্টিত কংগ্ৰেছ দলৰ প্ৰাৰ্থী পৱন সিং ঘাটোৱাৰতকৈ বিজেপি প্ৰাৰ্থী ৰামেশ্বৰ তেলীয়ে যে বিপুল ভোটত আগবাঢ়ি থাকিব সেইয়া ৰাজনৈতিক বিজ্ঞ মহলে একমুখে স্বীকাৰ কৰি লৈছে।
আনহাতে, চ’ছিয়েল মিডিয়া , বেনাৰ , পষ্টাৰ আদিৰ ক্ষেত্ৰতো মাৰ্ঘেৰিটা বিধান সভা সমষ্টিত বিজেপি যথেষ্ট আগবাঢ়ি থকা পৰিলক্ষিত হৈছে।
