বুধবাৰৰ পুৱাৰে পৰা ৰাজ্যত চলি থকা পঞ্চায়ত নিৰ্বাচনৰ ভোটগণনা এতিয়াও শেষ হোৱা নাই যদিও শিৱসাগৰ জিলাৰ অন্তৰ্গত পঞ্চায়ত নিৰ্বাচনৰ সম্পূৰ্ণ ফলাফল জিলা প্ৰশাসনে আজি দিনৰ ১২ বজাত ঘোষণা কৰিছে। জিলা প্ৰশাসনে জনোৱা অনুসৰি শিৱসাগৰ জিলাৰ ১২খন জিলা পৰিষদৰ ৬খনত বিজেপি, ৪খনত কংগ্ৰেছ আৰু ২খন আসন অসম গণ পৰিষদ দলে দখল কৰিবলৈ সক্ষম হয়।
কংগ্ৰেছ দলৰ দখলত থকা শিৱসাগৰ বিধানসভা সমষ্টিৰ ১৮ খন গাঁও পঞ্চায়তৰ ১২ খনত কংগ্ৰেছ আৰু ৬ খন গাঁও পঞ্চায়ত বিজেপিয়ে দখল কৰে। জানিব পৰা মতে বেতবাৰী, লাচিত, খেলুৱা, বানমুখ, দিচাংধাইআলি, হাঁহচৰা, চেৰেকাপাৰ, কোঁৱৰপুৰ, চাউলকৰা, নগৰমহল, ৰংপুৰ আৰু শলগুৰি গাঁও পঞ্চায়ত কংগ্ৰেছ দলৰ প্ৰাৰ্থী জয়ী হোৱাৰ বিপৰীতে দিচাংপাৰ, দিচাংমুখ, পানবেচা, শান্তিপুৰ, ৰূদ্ৰসাগৰ আৰু মগৰাহাট গাঁও পঞ্চায়তত বিজেপিৰ দখললৈ যায়।
আনহাতে শিৱসাগৰ বিধানসভা সমষ্টিৰ অন্তৰ্গত ৪ খন জিলা পৰিষদৰ কংগ্ৰেছ দলে ৩ খন আৰু বিজেপি দলে এখনত জয়ী হয়। ৰংপুৰ, শিৱসাগৰ আৰু বেতবাৰী জিলা পৰিষদ কংগ্ৰেছে আৰু বিজেপিয়ে দিচাংমুখ জিলা পৰিষদ দখল কৰে।
আনহাতে বিজেপিৰ দখলত থকা থাওৰা বিধানসভা সমষ্টিৰ অন্তৰ্গত পঞ্চায়ত সমূহৰো অধিকাংশ বিজেপিয়ে নিজৰ দখললৈ নিবলৈ সক্ষম হয়। বিধায়ক কুশল দুৱৰীৰ নেতৃত্বত বিজেপি দলে থাওৰা সমষ্টিৰ ২০ খন পঞ্চায়ত সভাপতিৰ পদৰ ১৮ খন জয়ী হোৱাৰ বিপৰীতে কংগ্ৰেছে মাত্ৰ ২ খনতহে জয়ী হবলৈ সক্ষম হয়। নেমুগুৰি আৰু থাওৰা দ’ল পঞ্চায়তৰ সভাপতি পদত কংগ্ৰেছ জয়ী হোৱাৰ বিপৰীতে বাকী ১৮ খন পঞ্চায়তত বিজেপিয়ে দখল কৰে। ইফালে থাওৰা সমষ্টিৰ ২০ টা আঞ্চলিক পঞ্চায়তৰ সদস্যৰ পদত ১৯ টা বিজেপিয়ে আৰু ১ টা কংগ্ৰেছ দখল কৰে।
আনহাতে থাওৰা সমষ্টিৰ ৪ খন জিলা পৰিষদৰ ৪ খনতেই বিজেপিয়ে দখল কৰে।
আনহাতে অগপৰ দখলত থকা আমগুৰি বিধান সভা সমষ্টিৰ ২১ খন গাঁও পঞ্চায়তৰ ১০ খনত কংগ্ৰেছ, ৮ খনত অগপ আৰু ৩ খনত বিজেপি বিজয়ী হৈছে।
খনামুখ, দেওৰজা, ম’ৰাবজাৰ, পেঙেৰা, বৰাহীবাৰী, লালিমচাপৰি, নামতিদ’ল, কাৱৈমাৰী আৰু বৰবাম গাঁও পঞ্চায়তত কংগ্ৰেছ জয়ী হয়। দিকচু, মেমাইতামুলী, বৰুৱাপুখুৰী, ভূঞাহাট, চাৰিং, হাফলুটিং, হাতীঘূলী আৰু দিখৌমুখ গাঁও পঞ্চায়ত অগপই দখল কৰাৰ বিপৰীতে বৰছিলা, বৰুৱাআলি আৰু আমগুৰি বাগান গাঁও পঞ্চায়ত বিজেপিয়ে দখল কৰে।
আমগুৰি সমষ্টিৰ ৪ খন জিলা পৰিষদৰ ২ খন অগপ, ১ খন বিজেপি আৰু এখন কংগ্ৰেছে দখল কৰে। জকাইচুক আৰু ম’ৰাবজাৰ জিলা পৰিষদ অগপই দখল কৰাৰ বিপৰীতে দোপদৰ জিলা পৰিষদ বিজেপিয়ে আৰু আমগুৰি জিলা পৰিষদ কংগ্ৰেছ দলে দখল কৰে।
