সমৰ্থকৰ চুনামী! জালুকবাৰীৰ পৰা পাণবজাৰলৈকে পথ বন্ধ কৰি হিমন্তই দাখিল কৰিলে মনোনয়ন

গুৱাহাটীৰ ৰাজপথত পৰিকল্পিতভাৱে বিজেপিৰ প্ৰতাপী মন্ত্ৰী ড০ হিমন্ত বিশ্ব শৰ্মাই দেখুৱালে নিজৰ শক্তি।

হিমন্তই শক্তি প্ৰদৰ্শন কৰিলে ঠিকেই কিন্তু জালুকবাৰীৰ পৰা পাণবজাৰলৈকে হিমন্তৰ বৃহৎ ৰেলীৰ বাবে ৫-৬ ঘন্টা বন্ধ হৈ থাকিল পথছোৱা।

১০ সহস্ৰাধিক জালুকবাৰীৰ সমৰ্থকৰে শক্তি প্ৰদৰ্শন কৰা হিমন্তৰ বাবেই যেন অন্য সাধাৰণ লোকে এক প্ৰকাৰৰ হাৰাশাস্তিৰ সন্মুখীন হ’বলগীয়া হয়।

ভৰলুস্থিত সোণাৰাম খেলপথাৰৰ পৰা ৰাস্তাৰ দুয়োকাষে কেৱল হিমন্ত বিশ্ব শৰ্মাৰ সমৰ্থকৰে ৰেলী ।

যাৰ ফলত এখন এম্বুলেন্সো কিছু সময়ৰ বাবে আৱদ্ধ হৈ থকা বুলি আমাৰ হাতলৈ খবৰ আহিছে।

ইপিনে, আৰক্ষীয়ে বেৰিকেড দি ৰখা সত্বেও কিছুসংখ্যক হিমন্ত বিশ্ব শৰ্মাৰ সমৰ্থকে উপায়ুক্ত কাৰ্য্যালয়ৰ সন্মুখভাগলৈকে প্ৰৱেশ কৰি হিমন্ত বিশ্ব শৰ্মা জিন্দাবাদ, অমিত শ্বাহ জিন্দাবাদ ধ্বনি দিয়ে।

অৱশ্যে, বিৰোধী প্ৰাৰ্থীসকলৰ ক্ষেত্ৰত প্ৰাৰ্থীৰ সৈতে ৪ জন লোককহে প্ৰৱেশৰ অনুমতি দিয়া হৈছিল বেৰিকেড দি থোৱা অংশত।

তাৰ বিপৰীতে হিমন্ত বিশ্ব শৰ্মাৰ সৈতে মুখ্যমন্ত্ৰী সৰ্বানন্দ সোণোৱাল, অন্য ৰাজ্যৰ মুখ্যমন্ত্ৰী, বিজেপিৰ কেন্দ্ৰীয় তথা ৰাজ্যিক নেতৃত্ব বেৰিকেড দি থোৱা অংশত প্ৰৱেশ কৰাৰ লগতে বেৰিকেড পাৰ হৈ আহি প্ৰায় অৰ্ধ শতাধিক লোকে কিদৰে জিলা উপায়ুক্তৰ কাৰ্য্যালয়ৰ সন্মুখত ‘বিজেপি জিন্দাবাদ, ‘অমিত শ্বাহ জিন্দাবাদ, হিমন্ত বিশ্ব শৰ্মা জিন্দাবাদ ধ্বনি দিবলৈ সুযোগ পালে সেয়া আলোচ্যৰ বিষয় হৈ পৰিছে।

ইয়াক লৈ প্ৰতিক্ৰিয়া প্ৰকাশ কৰিছে কংগ্ৰেছৰ মিডিয়া বিভাগৰ অধ্যক্ষ ববিতা শৰ্মাই।

নৰ্থ ইষ্ট নাওৰ সৈতে হোৱা টেলিফোনিক বাৰ্তাত তেওঁ কয় ‘মুখ্যমন্ত্ৰী সৰ্বানন্দ সোণোৱালেও নিজেই বেৰিকেড থকাৰ পাছতো তাত প্ৰৱেশ কৰিছে। তেওঁলোকে   আইন কিমান নামানে তাতে ধৰা পৰি গৈছে।  আইন শৃংখলা নামানি  তেওঁলোকে সাধাৰণ জনতালৈ এনে বাৰ্তা দিয়াৰ ফলতে এক অৰাজকতা আৰম্ভ হয়।‘

পাণবজাৰৰ কাছাৰী অঞ্চলৰ দুয়োফালে বেৰিকেড লগোৱা মাজৰ অংশত কেৱল সংবাদ মাধ্যম, প্ৰাৰ্থী-অধিবক্তাসহ ৫ গৰাকী, উক্ত অঞ্চলত থকা কাৰ্য্যালয়ৰ বিষয়া-কৰ্মচাৰী, আৰক্ষী-প্ৰশাসনৰ লোক থাকিব পাৰিব বুলি ধাৰ্য্য কৰা হৈছিল।

তাৎপৰ্য্যপূৰ্ণভাৱে মুখ্যমন্ত্ৰী সৰ্বানন্দ সোণোৱাল মন্ত্ৰী হিমন্ত বিশ্ব শৰ্মাৰ কাষৰে গৈ থকা সময়তে হিমন্তৰ একাংশ সমৰ্থকে ‘অসমৰ নায়ক  জিন্দাবাদ’ ধ্বনি দিয়ে।

ইপিনে, অসমৰ মুখ্যমন্ত্ৰীৰ লগতে মিজোৰামৰ মুখ্যমন্ত্ৰীকে ধৰি মুঠ ৬ গৰাকী মুখ্যমন্ত্ৰীয়ে মনোনয়ন দাখিলৰ পূৰ্বে সংগ দিয়া কথাটোৱে বিশেষ তাৎপৰ্য বহন কৰিছে।

তাৰ বিপৰীতে মুখ্যমন্ত্ৰী সৰ্বানন্দ সোণোৱালৰ মাজুলীত মনোনয়ন দাখিলৰ সময়ছোৱাত ৰাজ্যিক বিজেপিৰ সভাপতি ৰঞ্জিত দাস, মন্ত্ৰী হিমন্ত বিশ্ব শৰ্মাকহে দেখিবলৈ পোৱা গৈছিল।

ইয়াৰ পৰা অনুমান কৰিব পাৰি যে ২০২১ ত বিজেপি চৰকাৰ হ’লে মন্ত্ৰী হিমন্ত বিশ্ব শৰ্মাৰ মুখ্যমন্ত্ৰী হোৱাৰ পথ ইতিমধ্যেই মসৃণ হৈ পৰিছে।

ভিডিঅ’ লিংক  https://www.facebook.com/NNUnscripted/videos/2912703812351401