কাশ্মীৰত যেন বিজেপি চাফাই অভিযান আৰম্ভ কৰিছে সন্ত্ৰাসবাদীয়ে। কিছুদিন পূৰ্বে সন্ত্ৰাসবাদীয়ে কাশ্মীৰত যুৱ বিজেপি নেতা ৱাছিম মীৰক পিতৃ আৰু ভাতৃৰ সৈতে গুলীয়াই হত্যা কৰাৰ প্ৰতিক্ৰিয়া মাৰ নৌযাওঁতেই সন্ত্ৰাসবাদীয়ে আজি পুনৰ আন এজন বিজেপি নেতাক ৰাজপথৰ পৰাই অপহৰণ কৰাৰ ঘটনাই উপত্যকাটোত তীব্ৰ প্ৰতিক্ৰিয়াৰ সৃষ্টি কৰিছে।
আৰক্ষীয়ে প্ৰকাশ কৰা তথ্য অনুসৰি বাৰামুল্লা ৱাটাৰগ্ৰাম পৌৰসভাৰ উপ-সভাপতি মেহৰাজউদ্দিন মোল্লাক ৰাজপথৰ পৰাই সন্ত্ৰাসবাদীয়ে এখন গাড়ীত বলপূৰ্বক তুলি নিয়ে ।
এই ঘটনাৰ খবৰ পোৱাৰ পিছতে আৰক্ষীয়ে অপহৃত লোক জনৰ সন্ধানত অভিযান চলাইছে যদিও এতিয়ালৈকে তেওঁক উদ্ধাৰ কৰিবলৈ সক্ষম হোৱা নাই ।
আৰক্ষীয়ে সন্দেহ কৰা অনুসৰি বিজেপি নেতাজনক পাকিস্তানৰ সন্ত্ৰাসবাদীয়ে অপহৰণকৰি নিছে।
প্ৰত্যক্ষদৰ্শীয়ে প্রকাশ কৰা মতে এখন ছেন্ট্ৰ’ গাড়ীত সন্ত্ৰাসবাদীয়ে লোক জনক উঠাই লৈ যায়।
কিছুদিন পূৰ্বে ছপৰে অঞ্চলত ৱাছিম বাৰি নামৰ বিজেপি নেতা জনক সন্ত্ৰাসবাদীয়ে ঘৰতে পৰিয়ালৰ আন কেবাজনো লোকৰ সৈতে গুলীয়াই হত্যা কৰিছিল।
কাশ্মীৰৰ পৰা চৰকাৰে সংবিধানৰ ৩৭০ অনুচ্ছেদ বাতিল কৰাৰ পিছতে উপত্যকাটোত সন্ত্ৰাসবাদীয়ে বিজেপিৰ নেতা কৰ্মী সকলক টাৰ্গেট কৰি লৈছে।
