সন্দিকৈ ছোৱালী মহাবিদ্যালয়তো নিষিদ্ধ হ’ল বিজেপিৰ নেতাৰ প্ৰৱেশ
নাগৰিকত্ব সংশোধনী বিধেয়ক বাতিলৰ দাবীত ছাত্ৰ সমাজে প্ৰতিবাদ তীব্ৰতৰ কৰাৰ সময়তে এতিয়া শাসনাধিষ্ঠ বিজেপিৰ বিৰুদ্ধে একাংশ মহাবিদ্যালয়-বিশ্ববিদ্যালয়ে গ্ৰহণ কৰিছে কঠোৰ সিদ্ধান্ত। গুৱাহাটী বিশ্ববিদ্যালয়ৰ পাছতে এইবাৰ সন্দিকৈ ছোৱালী মহাবিদ্যালয়তো নিষিদ্ধ কৰিলে বিজেপিৰ নেতা-কৰ্মীৰ প্ৰৱেশ।
উল্লেখ্য যে যোৱা ৭ জানুৱাৰিত বিধেয়কখন লোকসভাত গৃহীত হোৱাৰ পিছৰে পৰা দল-সংগঠনৰ লগতে ছাত্ৰ সমাজে বিধেয়কখন বাতিলৰ দাবীত বিভিন্ন প্ৰতিবাদী কাৰ্যসূচী গ্ৰহণ কৰাৰ পাছতো নিজৰ স্থিতিত অটল থকা সোণোৱাল নেতৃত্বাধীন চৰকাৰৰ বিৰুদ্ধে এনে হঠকাৰী সিদ্ধান্ত গ্ৰহণ কৰিবলৈ বাধ্য হ’ল বুলি সন্দিকৈ মহাবিদ্যালয়ৰ ছাত্ৰী একতা সভাই জানিবলৈ দিয়ে।
এই সন্দৰ্ভত জানিবলৈ দি কয় যে বিধেয়কখন বাতিল নোহোৱা পৰ্যন্ত মহাবিদ্যালয়ৰ চৌহদত বিজেপি নেতাই প্ৰৱেশ কৰিব নোৱাৰিব। তদুপৰি নোৱাৰিব মহাবিদ্যালয়ৰ কোনো অনুষ্ঠানতে অংশ ল’ব। শীঘ্ৰে নাগৰিকত্ব সংশোধনী বিধেয়কখন বাতিল কৰাৰ দাবীৰে ছাত্ৰী একতা সভাৰ সৰ্বসন্মতিসন্মতি ক্ৰমে এই সিদ্ধান্ত গ্ৰহণ কৰা হয় বুলি জনায়।
উল্লেখ্য যে গুৱাহাটী বিশ্ববিদ্যালয় আৰু সন্দিকৈ ছোৱালী মহাবিদ্যালয়ৰ লগতে কলিয়াবৰ মহাবিদ্যালয় ছাত্ৰ একতা সভাইও নাগৰিকত্ব (সংশোধনী) বিধেয়ক ২০১৬ বাতিলৰ দাবীত চৰকাৰী পক্ষৰ নেতাসকলক মহাবিদ্যালয়ত প্ৰৱেশ কৰিবলৈ দিয়া নহ’ব বুলি ১১ জানুৱাৰিত স্পষ্ট কৰি দিছিল।