দুলীয়াজানত আজি বিহুৰ উৰুকাৰ দিনাই নাগৰিকত্ব সংশোধনী বিধেয়কখনক সমৰ্থন কৰা এজন বাঙালী যুৱকক আঁঠু কঢ়াই কাণত ধৰোৱাৰ লগতে মাৰপিট কৰাটোৱে সচেতন মহলক চিন্তিত কৰি তুলিছে। প্ৰায় সংখ্যক অসমীয়াই বিধেয়কখনৰ বিৰোধিতা কৰিছে যদিও বিধেয়কখনৰ সমৰ্থন কৰিবলৈ থকা গণতান্ত্ৰিক অধিকাৰক এই ঘটনাটোৱে খৰ্ব কৰা দেখা গৈছে, যিটো বিধেয়কখন বিৰোধিতা কৰা বাবেই অসম বিশ্ববিদ্যালয়ৰ ছাত্ৰ-ছাত্ৰীক বিজেপি নেতাই ভাবুকি দিয়াৰ সমপৰ্য্যায়ৰ বুলি গণ্য কৰিব পাৰি।
মানসপ্ৰতিম গগৈ নামৰ এটা ফেইচবুক একাউণ্টত আপল’ড কৰা এটা ভিডিঅ’ত যুৱকজনক কাণত ধৰাই থোৱাৰ লগতে মাৰপিট কৰা দৃশ্য দেখা গৈছে। ঘটনাটোৰ সময়ত উপস্থিত যুৱককেইজনে বাঙালী সম্প্ৰদায়ৰ যুৱকজনক সৈ কাঢ়িবলৈ হুমকি দিয়াও দেখা গৈছে।
যুৱককেইজনৰ হুমকিত বাঙালী যুৱকজনে কয়, “মই বিধেয়কখন আইনত পৰিণত হ’লে আপোনালোকে ভয় খাব বুলি কৈছিলো।”
“মোৰ ভুল হৈ গ’ল। মই ভৱিষ্যতে আৰু কেতিয়াও এনে কাম নকৰো। মই ভৱিষ্যতে কাৰো লগত বেয়া ব্যৱহাৰ নকৰো।” উদণ্ড অসমীয়া যুৱককেইজনৰ ধমকিত এইদৰে সৈ কাঢ়ে বাঙালী যুৱকজনে।
ভুক্তভোগী বাঙালী যুৱকজনৰ নাম কি জানিব পৰা হোৱা নাই। আনহাতে ঘটনাটোত জড়িত তথা ভিডিঅ’টোত দেখা পোৱা যুৱককেইজনৰ বিৰুদ্ধে এই পৰ্য্যন্ত কোনেও এজাহাৰ দাখিল কৰাৰ বাতৰি অহা নাই।
উল্লেখযোগ্য যে যোৱা দুদিনত বিধেয়কখনক কেন্দ্ৰ কৰি সৃষ্টি হোৱা পক্ষ-বিপক্ষৰ ফলত বাঙালী আৰু অসমীয়া মানুহৰ মাজত এনেকুৱা একাধিক সংঘাতৰ ঘটনা ঘটিছে, যিটোক অতি অশুভ সংকেত বুলিব পাৰি। বিধেয়কখন সমৰ্থন কৰিবলৈ গৈ বাঙালীসকলৰ মাজৰ বহুতে সততে অসমীয়া বিদ্বেষী মন্তব্য কৰা আৰু বিৰোধিতা কৰিবলৈ গৈ অসমীয়াৰ মাজৰ বহুতে বাঙালীসকলক ভাবুকি দিয়াৰ দৰে কেইবাটাও ঘটনা ঘটিছে। বিধেয়কখন গৃহীত হওকেই বা নহওকেই, ই যে অসমত অসমীয়া আৰু বাঙালীৰ মাজৰ সম্প্ৰীতিক বাৰুকৈয়ে ক্ষতিগ্ৰস্ত কৰিব তাকে প্ৰমাণ কৰিছে এই ঘটনাবোৰে।
উদ্বেগজনক কথাটো হ’ল, ভিডিঅ’টোৰ তলত বেছিভাগ য়ুজাৰেই ঘটনাটোক ন্যায্যতা দিয়া দেখা গৈছে। এই উদাহৰণবোৰে বিধেয়কখনক কেন্দ্ৰ কৰি ৰাজ্যত পুনৰ উগ্ৰ আৰু অন্ধ জাতীয়তাবাদে মূৰ দাঙি উঠাৰ পূৰ্ণ সম্ভাৱনা দাঙি ধৰিছে।