‘অসমত বিজেপি চৰকাৰৰ কাৰ্যকালত কোনো সংগঠনৰ দাদাগিৰি নচলিব।‘ এই মন্তব্য দুলীয়াজানৰ বিজেপি বিধায়ক তেৰছ গোৱালাৰ।
অইল ইণ্ডিয়া লিমিটেড আৰু অসম ৰাজ্যিক গ্ৰামোন্নয়ন প্ৰতিষ্ঠানৰ যুটীয়া প্ৰকল্প ৰূপান্তৰৰ উদ্যোগত টিপলিংস্থিত প্ৰশিক্ষণ কেন্দ্ৰত শুকুৰবাৰে আয়োজিত হিতাধিকাৰীৰ মাজত সামগ্ৰী বিতৰণ অনুষ্ঠানত আমন্ত্ৰিত অতিথি হিচাপে উপস্থিত থকা গোৱালাই ভাষণ প্ৰসংগত এইদৰে মন্তব্য কৰে।
দল-সংগঠনসমূহৰ বিৰুদ্ধে আক্ৰমণাত্মক হৈ পৰা গোৱালাই কয় যে অইল ইণ্ডিয়া লিমিটেডক বিভিন্ন সময়ত বাধা দিবলৈ নিবিদাযোগে সংগঠনসমূহক ঠিকা দিয়া হোৱা নাই। সংগঠনসমূহে অইল ইণ্ডিয়াত কাম কৰিবলৈ অহা বিভিন্ন কোম্পানীক উগ্ৰপন্থীৰ দৰে হেঁচা দি ভয়ংকৰ পৰিস্থিতিৰ সৃষ্টি কৰিছে।
ইপিনে, তৈলক্ষেত্ৰসমূহৰ ব্যক্তিগতকৰণৰ প্ৰসংগত গোৱালাই কয় যে জ্ঞান নথকাকৈ বা নজনা-নুবুজাকৈ তৈলক্ষেত্ৰসমূহ ব্যক্তিগত খণ্ডক গতাই দিয়া নাই। ইয়াক লৈ সংগঠনসমূহে অশান্তিকৰ পৰিস্থিতিৰ সৃষ্টি কৰাৰ কোনো যুক্তি নাই বুলি কৈ প্ৰতিষ্ঠানটোৰ বিৰুদ্ধে কোনো সংগঠনে অনাহকত বন্ধ কাৰ্যসূচী গ্ৰহণ কৰিলে ইয়াৰ বিৰুদ্ধে ৰাইজক ওলোটাই প্ৰতিবাদ কৰিবলৈ আহ্বান জনায়।
আনহাতে, উক্ত সভাত উপস্থিত থাকি নতুনকৈ কেন্দ্ৰীয় মন্ত্ৰিত্ব লাভ কৰা ৰামেশ্বৰ তেলীয়ে অইলক ৰাইজৰ উদ্যোগ বুলি অভিহিত কৰি ইয়াক জীয়াই ৰখাটো ৰাইজৰে দায়িত্ব বুলি মন্তব্য কৰে।
সভাখনত তিনিচুকীয়াৰ বিধায়ক সঞ্জয় কিষাণ, জিলা পৰিষদৰ অধ্যক্ষ ডেইজী শ্যাম ফুকন, অইলৰ আৱাসিক মুখ্য বিষয়া প্ৰানজিৎ ডেকা, প্ৰজেক্ট ৰূপান্তৰৰ অধ্যক্ষ বিমল দত্ত, অইলৰ জনসম্পৰ্কৰক্ষী বিষয়া দিলীপ ভূঞাকে ধৰি হিতাধিকাৰী তথা বহু গণ্য-মান্য ব্যক্তি উপস্থিত থাকে।
