কৰ’নাৰ বিধি উলংঘা: বিজেপি সাংসদ সাক্ষী মহাৰাজক ১৪দিনৰ কোৱাৰেন্টাইনলৈ প্ৰেৰণ
কৰ’নাৰ আতংকৰ মাজতে স্বাস্থ্যবিধি অমান্য কৰি ঘুৰি ফুৰাৰবাবে উত্তৰ প্ৰদেশৰ বিজেপি সাংসদ সাক্ষী মহাৰাজক ঝাৰখণ্ড আৰক্ষীয়ে ১৪ দিনৰ বাবে হোম কোৱাৰেন্টাইন কৰিছে।
ৰাজ্যখনত বাহিৰৰ পৰা অহা লোকক ১৪ দিনৰ বাবে পৃথকে ৰখাৰ নিয়ম বান্ধি দিছে ৰাজ্য চৰকাৰে।
ৰাজ্যখনৰ আৰক্ষীয়ে কোভিড বিধি অনুসৰণ কৰিয়েই সাংসদগৰাকীৰ বিৰুদ্ধে এই পদক্ষেপ গ্ৰহণ কৰিছে।
বাতৰি অনুসৰি, উত্তৰ প্ৰদেশৰ সাংসদ সাক্ষী মহাৰাজ শনিবাৰে ঝাৰখণ্ডৰ গিৰিধত ব্যক্তিগত কামত গৈছিল। তাৰপৰা তেওঁ পথেৰে ধানবাদলৈ গৈছিল।
ইয়াৰ পাছতে কৰ’নাৰ বিধি উলংঘা কৰি পথত ঘুৰি ফুৰাৰ অভিযোগত ঝাৰখণ্ড আৰক্ষীয়ে তেওঁক আটক কৰে।
কৰ’না বিধি অনুসৰি সাংসদগৰাকীক ১৪ দিনৰ বাবে হোম কোৱাৰেন্টাইনলৈ প্ৰেৰণ কৰা হৈছে।
দেশৰ আন অংশৰ লগতে ঝাৰখণ্ডতো কৰ’না আক্ৰান্তৰ সংখ্যা বৃদ্ধি পাইছে। ৰাজ্যখনত এতিয়ালৈকে কৰ’না ভাইৰাছত আক্ৰান্তৰ সংখ্যা ৩৭হাজাৰ ১১২জনলৈ বৃদ্ধি পাইছে।
বিগত ২৪ ঘন্টাত নতুনকৈ ১২৯৯জন লোক কৰ’নাত আক্ৰান্ত হৈছে আৰু ৮জনৰ মৃত্যু হৈছে।
অৱশ্যে, ৰাজ্যখনত ইতিমধ্যে ২৫হাজাৰতকৈয়ো অধিক ৰোগী কৰ’নামুক্ত হৈ উঠিছে। বৰ্তমান ৰাজ্যখনৰ ১১হাজাৰ ৪৯৮ জন কৰ’না আক্ৰান্ত ৰোগী চিকিৎসাধীন হৈ আছে।
বাতৰি অনুসৰি, ঝাৰখণ্ডৰ হেমন্ত চোৰেনৰ চৰকাৰখনে কৰ’নাৰ নিয়ন্ত্ৰণৰ বাবে কঠোৰ নীতি বলবৎ কৰাৰ চিন্তা-চৰ্চা চলাইছে।