মুখ্যমন্ত্ৰীৰ সমষ্টিত পঞ্চায়ত সদস্যৰ দাদাগিৰিয়ে এতিয়া চকু থৰ লগাইছে বহুতৰে।
পঞ্চায়তৰ দুৰ্নীতিৰ প্ৰতিবাদ কৰাৰ বাবেই বিজেপিৰ পৰা নিৰ্বাচিত সদস্যই নৃশংস আক্ৰমণ কৰিলে বিজেপি কৰ্মীকে।
গুৰুলা গুৰুলকৈ প্ৰহাৰ কৰি ভাঙি পেলালে ভৰি।
পূব শুৱালকুছি গাঁও পঞ্চয়তৰ সদস্য ৰমণী দাসৰ বিৰুদ্ধে শুৱালকুছি আৰক্ষী থানাত দাখিল এজাহাৰ কৰা হৈছে।
মুখ্যমন্ত্ৰীৰ জালুকবাৰী সমষ্টিৰ পূৱ শুৱালকুছি পঞ্চায়তত চলা চৰম অনিয়ম আৰু দুৰ্নীতিৰ বিৰোধিতা কৰাৰ বাবেই গুৰুলা গুৰুলকৈ প্ৰহাৰ কৰি পঞ্চায়ত সদস্য ৰমণী দাসে ভৰি ভাঙিলে এজন বিজেপি কৰ্মীৰ।
শুৱালকুছিৰ পূৱ শুৱালকুছি পঞ্চায়তত চলি থকা অনিয়ম আৰু দুৰ্নীতিৰ বিৰুদ্ধে প্ৰায় শতাধিক মহিলাই প্ৰতিবাদ সাৱস্ত্য কৰি ঘেৰাও কৰিছিল পঞ্চায়ত কাৰ্য্যালয়ত।
প্ৰতিবাদত অংশ লৈছিল শুৱালকুছি বৰ নিজৰাপাৰৰ ৰাতুল দাসৰ পত্নী মিনু দাস নামৰ মহিলাগৰাকীয়ো ।
সেয়াই হল অপৰাধ ,যাৰ বাবে প্ৰতিবাদ জনাবলৈ যোৱা মহিলা গৰাকীৰ স্বামী ৰাতুল দাসক নিৰ্মম ভাৱে আক্ৰমণ কৰে পঞ্চায়তখনৰ সদস্য ৰমণী দাসে।
শুৱালকুছিত সংঘটিত এই ঘটনাই তীব্ৰ চাঞ্চল্যৰ সৃষ্টি কৰিছে। অতি শীঘ্ৰে পঞ্চায়ত সদস্য ৰমণী দাসক গ্ৰেপ্তাৰৰ দাবী জনাইছে ৰাইজে।
