তথ্য আৰু প্ৰযুক্তিৰ খণ্ডত দ্ৰুতগতিত হ্ৰাস পাইছে চাকৰিৰ সংখ্যা। layoff.fyi ৰ শেহতীয়া তথ্য অনুসৰি ২০২৪ চনৰ প্ৰথম ৪ মাহত বিশ্বজুৰি ৮০ হাজাৰতকৈ অধিক আই টি কৰ্মীক চাকৰিৰ পৰা বৰ্খাস্ত কৰা হৈছে।
তথ্য অনুসৰি ২০২৪ চনৰ জানুৱাৰীৰ পৰা ৩ মে’লৈকে বিশ্বৰ ২৮১টা আই টি কোম্পানীৰ ৮০,৬২৮ জন কৰ্মচাৰী চাকৰিৰ পৰা বৰ্খাস্ত কৰা হৈছে।
ইয়াৰ পূৰ্বে ২০২২ আৰু ২০২৩ চনত বিশ্বৰ বিভিন্ন আই টি কোম্পানীৰ পৰা ৪,২৫,০০০ কৰ্মচাৰীক চাকৰিৰ পৰা বৰ্খাস্ত কৰা হৈছিল। ২০২২ চনৰ তুলনাত ২০২৩ চনত প্ৰায় ৫৯% অধিক কৰ্মচাৰীক চাকৰিৰ পৰা বৰ্খাস্ত কৰা হৈছিল।
অতি শেহতীয়াকৈ আমেৰিকাৰ আই টি কোম্পানী স্প্ৰিংকলাৰৰ পৰা ১১৬ জন কৰ্মীক চাকৰিৰ পৰা বৰ্খাস্ত কৰা হৈছে। লগতে এই সপ্তাহতে ফিটনেছ কনচালটেন্সী পেলটনে নিজৰ ১৫ শতাংশ কৰ্মচাৰীক বৰ্খাস্ত কৰাৰ কথা ঘোষণা কৰিছে। ফলত এই সপ্তাহত প্ৰায় ৪০০ শ্ৰমিকে চাকৰি হেৰুৱাব লগা হৈছে।
খবৰ অনুসৰি শেহতীয়াকৈ গুগলৰ মূল টীমৰ পৰাও ২০০ জন কৰ্মচাৰীক চাকৰিৰ পৰা বৰ্খাস্ত কৰা হৈছে।
শেহতীয়াকৈ ইলন মাস্কৰ কোম্পানী টেছলাই ১০০ৰো অধিক কৰ্মচাৰীক চাকৰিৰ পৰা বৰ্খাস্ত কৰিছে। কেইসপ্তাহমানৰ আগতে টেছলাই নিজৰ ১০ শতাংশ কৰ্মীক চাকৰিৰ পৰা বৰ্খাস্ত কৰিছিল। এই সংস্থাটোত মুঠ কৰ্মচাৰীৰ সংখ্যা আছিল ১৪ হাজাৰ। জানিব পৰা মতে টেছলাৰ চাৰ্জিং টীমৰ সকলো সদস্যক ক্ৰমান্বয়ে বৰ্খাস্ত কৰা হ’ব।
ভাৰতত পৰিবহণৰ সহযোগী কোম্পানী ওলাইও নিজৰ ১০ শতাংশ শ্ৰমিকক চাকৰিৰ পৰা বৰ্খাস্ত কৰাৰ কথা ঘোষণা কৰিছে। সংস্থাটোৱে জনাইছে যে এই চাকৰিচ্যুতি প্ৰক্ৰিয়াই সংস্থাটোক সুশৃংখলিত কৰি ৰাখিব।
