ছয় জনগোষ্ঠীৰ জনজাতিকৰণৰ দাবীত তাই আহোম যুৱ ছাত্ৰ পৰিষদ আৰু তাই আহোম ছাত্ৰ সন্থাই শনিবাৰে আহ্বান জনোৱা ১২ ঘণ্টীয়া অসম বন্ধৰ সময়ত এগৰাকী মহিলা চিকিৎসকক আক্ৰমণৰ ঘটনা সন্দৰ্ভত আটক হোৱা অভিযুক্তক কেন্দ্ৰ কৰি এতিয়া অভিযোগ-প্ৰতি অভিযোগৰ ৰাজনীতি চলিছে।
ঘটনা সন্দৰ্ভত আৰক্ষীয়ে আটক কৰা বন্ধ সমৰ্থনকাৰী বিপুল বুঢ়াগোঁহাই নামৰ লোকজনৰ বিজেপিৰ লগত থকা সম্পৰ্ক সম্বন্ধে অসমৰ একাংশ সংবাদ মাধ্যমত বাতৰি প্ৰকাশ কৰা হৈছিল। আটকাধীন বিপুল বুঢ়াগোঁহাইক ডিগবৈৰ বিতৰ্কিত বিধায়ক সুৰেণ ফুকনৰ ঘনিষ্ঠ আৰু বৰবিল গাঁও পঞ্চায়তৰ বিজেপিৰ প্ৰাক্তন বুথ সভাপতি হিচাপে উল্লেখ কৰি বাতৰি প্ৰকাশ কৰা হৈছিল।
সংবাদ মাধ্যমত প্ৰকাশ পোৱা এই বাতৰিয়ে ৰাজ্যত প্ৰতিক্ৰিয়া সৃষ্টি কৰাৰ সময়তে আজি ভাৰতীয় জনতা পাৰ্টিৰ ডিগবৈ মণ্ডল সমিতিৰ সাধাৰণ সম্পাদক কুশল মৰাণে দলৰ ফালৰ পৰা প্ৰকাশিত এক প্ৰেছ বিবৃতি যোগে বিপুল বুঢ়াগোঁহাই কোনো ধৰণে বিজেপিৰ লগত জড়িত নহয় বুলি স্পষ্টীকৰণ প্ৰকাশ কৰি অভিযুক্ত ব্যক্তিজনে দুবছৰ পূৰ্বেই দলৰ প্ৰাথমিক সদস্য পদ ত্যাগ কৰা বুলি প্ৰকাশ কৰে।
আনহাতে, তাই আহোম ছাত্ৰ সন্থাই বিপুল বুঢ়াগোঁহাইক ডিগবৈ তাই আহোম ছাত্ৰ সন্থাৰ দায়িত্বভাৰৰ পৰা সাময়িকভাবে অব্যাহতি প্ৰদান কৰিছে। স্বাভাৱিকতে আৰক্ষীয়ে আটক কৰা অভিযুক্তজনক লৈ চলি থকা এই অভিযোগ-প্ৰতি অভিযোগে সচেতন মহলৰ মাজত প্ৰতিক্ৰিয়াৰ সৃষ্টি কৰিছে।
