এ আই ইউ ডি এফৰ সভাপতি বদৰুদ্দিন আজমলে ক্ষমতাৰ বাবে ৰাজনীতি কৰে। তেওঁক কংগ্ৰেছে অসমৰ মুখ্যমন্ত্ৰী হ’বলৈ সাৰপানী যোগাইছে। আজমল অসমৰ মুখ্যমন্ত্ৰী হ’লে প্ৰথমে মই আত্মহত্যা কৰিম। শনিবাৰে হোজাইৰ নীলবাগানত অনুষ্ঠিত বিজেপিৰ এক ৰাজহুৱা সভাত এইদৰে মন্তব্য কৰে ৰাজ্যিক বিজেপিৰ সভাপতি ৰঞ্জিৎ কুমাৰ দাসে।
দুই সহস্ৰাধিক লোকৰ উপস্থিতিত ভাষণ প্ৰদান কৰি ৰাজ্যিক সভাপতি দাসে চৰকাৰে গ্ৰহণ কৰা উন্নয়নমূলক আঁচনিৰ বিষয়ে উল্লেখ কৰাৰ সমান্তৰালভাৱে কংগ্ৰেছ আৰু এ আই ইউ ডি এফক তীব্ৰ সমালোচনাৰ লক্ষ্য কৰি লয়।
তেওঁ কয়, ‘’আজমল আৰু কংগ্ৰেছ এটা মুদ্ৰাৰ ইপিঠি-সিপিঠি। আজমল ডাঙৰীয়াৰ ভাষ্য হ’ল “মোডী হাটাও দেশ বাচাও“। কিন্তু তেখেতৰ মুখ্যমন্ত্ৰী হোৱাৰ সপোন সপোন হৈয়ে ৰ’ব কিয়নো অসমীয়া আৰু ভাৰতীয়ৰ গণতান্ত্ৰিক স্বাভিমান যেতিয়া লৈ থাকিব তেতিয়ালৈ তেখেতৰ মনোবাঞ্ছা পূৰন নহয়।‘’
আনহাতে, সভাৰ অন্তত ৰাজ্যিক সভাপতি দাসে কয় যে দিল্লীত কংগ্ৰেছৰ স’তে মিত্ৰতা কৰি আজমলে মুখ্যমন্ত্ৰী হোৱাৰ সপোন ৰচিছে। আজমল মুখ্যমন্ত্ৰী হ’লে অসমৰ আভ্যন্তৰীণ ক্ষেত্ৰত যি ভয়াৱহ পৰিস্থিতিৰ সৃষ্টি হ’ব তাতকৈ তেওঁ আত্মহত্যা কৰাই ভাল বুলি ভাবিব।
শনিবাৰে অনুষ্ঠিত ৰাজহুৱা সভাখনত কেন্দ্ৰীয় ৰে’ল ৰাজ্যিক মন্ত্ৰী ৰাজেন গোহাঁই, মন্ত্ৰী পৰিমল শুক্লবৈদ্য, সংখ্যালঘূ উন্নয়ন পৰিষদৰ অধ্যক্ষ মমিনুল আওৱাল, ভাৰতীয় জনতা পাৰ্টী,অসম প্ৰদেশৰ বিভিন্ন বিষয়ববীয়া,কাৰ্যকৰ্তা ক্ৰমে তৌফিক ৰহমান,মুক্তাৰ হুছেইন খান, লংকি ফাংছো, হোজাই জিলাৰ সভাপতি অৰ্জুন মজুমদাৰ লগতে একাধিক নেতা উপস্থিত থাকে।
