সাংবাদিক ৰাজেন ডেকাক ফে’চবুকত ভাবুকি দিয়া বিজেপি কৰ্মীক গ্ৰেপ্তাৰ
আৰক্ষীৰ জালত পৰিছে দৈনিক অসম কাকতৰ মুকালমুৱাৰ সাংবাদিক ৰাজেন ডেকাক ফে’চবুকত ভাবুকি দিয়া জিণ্টু মেধি নামৰ এজন যুৱক। প্ৰাপ্ত খবৰ মতে জিণ্টু মেধি এগৰাকী বিজেপি কৰ্মী।
২৫ এপ্ৰিলৰ নিশা সাংবাদিক ৰাজেন ডেকাক এটা চাৰি-পাঁচজনীয়া দুৰ্বৃত্তৰ দলে চোকা অস্ত্ৰৰে প্ৰহাৰ কৰি গুৰুতৰভাৱে আঘাতপ্ৰাপ্ত অৱস্থাত পথৰ কাষত পেলাই থৈ গৈছিল।
উল্লেখযোগ্য যে সাংবাদিক গৰাকীৰ ওপৰত আক্ৰমণ চলোৱাৰ আগৰ দিনা অৰ্থাৎ ২৪ এপ্ৰিলত বৰক্ষেত্ৰী বিজেপি কৰ্মী জিণ্টু মেধিয়ে ৰাজেন ডেকাৰ এটা বাতৰি ফে’চবুকত প’ষ্ট কৰি সাংবাদিকজনক ভাবুকি প্ৰদান কৰিছিল। উক্ত প’ষ্টটোত একাংশ ব্যক্তিয়ে ডেকাক হত্যাৰ ভাবুকিও প্ৰদান কৰিছিল।
ইয়াৰ পিছতে সাংবাদিকজনক ২৫ এপ্ৰিলত এটা চাৰি-পাঁচজনীয়া দুৰ্বৃত্তৰ দলে চোকা অস্ত্ৰৰে প্ৰহাৰ কৰি হত্যাৰ অপচেষ্টা চলায়।
সাংবাদিক গৰাকীক আক্ৰমণ চলোৱাৰ পিছতে জিণ্টু মেধিয়ে ফে’চবুকৰ পৰা উক্ত প’ষ্টটো ডিলিট কৰিছিল। অৱশ্যে একাংশ লোকে ৰাখি থোৱা প’ষ্টটোৰ স্ক্ৰিন ছট ছ’চিয়েল মিডিয়াত ভাইৰেল হৈ পৰাৰ পিছতে শনিবাৰে নিশা জিণ্টু মেধিক আৰক্ষীয়ে গ্ৰেপ্তাৰ কৰি জে’ললৈ প্ৰেৰণ কৰে।
আনহাতে কেইবাদিন ওকলি যোৱাৰ পিছটো আৰক্ষীয়ে উক্ত আক্ৰমণৰ সৈতে জড়িত এজনো লোকক আটক কৰিবলৈ সক্ষম নোহোৱাৰ কথাটো সচেতন মহলৰ মাজত প্ৰতিক্ৰিয়াৰ সৃষ্টি কৰিছে।