পঞ্চায়ত-গ্ৰামোন্নয়নত নিযুক্তি কেলেংকাৰি! বিজেপি কৰ্মী ৰাজীৱ পৰাশৰক গ্ৰেপ্তাৰ
মুখ্য মন্ত্ৰী সৰ্বানন্দ সোণোৱালৰ শূন্য সহনশীলতাৰ নীতিৰ যেন বাস্তৱ ৰূপায়ন ঘটিছে। অসম আৰক্ষীৰ উপ পৰিদৰ্শক কেলেংকাৰিৰ তাৎক্ষণিকভাৱে চি আই ডিৰ দ্বাৰা তদন্ত কৰাই শিপা উভালি পেলাবলৈ সক্ষম হোৱাৰ পাছত এইবাৰ পঞ্চায়ত আৰু গ্ৰামোন্নয়নৰ নিযুক্তি কেলেংকাৰিৰ শিপা উদ্ধাৰত নামি পৰিছে আৰক্ষী।
প্ৰায় দুবছৰ পূৰ্বে পঞ্চায়ত আৰু গ্ৰামোন্নয়ন বিভাগত নিযুক্তি প্ৰক্ৰিয়া সম্পন্ন কৰা হৈছিল। এই প্ৰক্ৰিয়াত ব্যাপক বিসংগতিৰ অভিযোগ উত্থাপিত হৈছিল।
ইয়াৰ মাজতে পঞ্চায়ত আৰু গ্ৰামোন্নয়নৰ নিযুক্তি কেলেংকাৰিত জড়িত থকাৰ অভিযোগত শুকুৰবাৰে এগৰাকী বিজেপি কৰ্মী ৰাজীৱ পৰাশৰক অসম আৰক্ষীৰ অপৰাধ শাখাই গ্ৰেপ্তাৰ কৰে।
আৰক্ষীৰ অপৰাধ শাখাই অভিযান চলাই গুৱাহাটীৰ খ্ৰীষ্টাৰবস্তিৰ অনিল প্লাজাৰ পৰা ৰাজীৱ পৰাশৰক গ্ৰেপ্তাৰ কৰে।
বিজেপি কৰ্মী ৰাজীৱ পৰাশৰ পঞ্চায়ত আৰু গ্ৰামোন্নয়নৰ নিযুক্তি কেলেংকাৰিত পোনপোটীয়াকৈ জড়িত থকাৰ অভিযোগ উঠিছিল।
আৰক্ষীৰ অপৰাধ শাখাই ৰাজীৱ পৰাশৰৰ ছয়মাইলস্থিত বাসগৃহতো অভিযান চলাই বহুতো নথি-পত্ৰ, লেপটপ আদি জব্দ কৰে।
পঞ্চায়ত আৰু গ্ৰামোন্নয়নৰ এই নিযুক্তিত বিভাগীয় মন্ত্ৰী নৱ কুমাৰ দলেৰ বিৰুদ্ধেও অভিযোগ উত্থাপিত হৈছিল আৰু মন্ত্ৰীগৰাকীৰ অঙহী-বঙহীয়ে চাকৰি লাভ কৰাৰ বাতৰি প্ৰকাশ পাইছিল।
বৰ্তমান চলি থকা অসম আৰক্ষীৰ উপ-পৰিদৰ্শক পদৰ নিযুক্তি কেলেংকাৰিৰ তদন্তত বিজেপি নেতাৰ পৰা আৰম্ভ কৰি আৰক্ষীৰ উচ্চ পদস্থ বিষয়া লৈকে চি আই ডিৰ জালত পৰাৰ পাছত তদন্তৰ গতিক লৈ বহুতেই সন্তুষ্টি প্ৰকাশ কৰিছে আৰু নিযুক্তি প্ৰক্ৰিয়াত স্বচ্ছাতা ঘুৰি অহাৰ কামনা কৰিছে।
সেইদৰে, পঞ্চায়ত আৰু গ্ৰামোন্নয়নৰ নিযুক্তি কেলেংকাৰিৰো ক্ষিপ্ৰতাৰে তদন্ত কৰি ইয়াৰ সৈতে জড়িত লোকসকলক আইনৰ আওতালৈ আনিবলৈ অসম আৰক্ষী সক্ষম হ’ব বুলি ৰাইজে আশা কৰিছে।