বড়ো উইমেন জাষ্টিছ ফ’ৰামৰ নেত্ৰী অঞ্জলি দৈমাৰীয়ে বড়োলেণ্ড পিপুলছ ফ্ৰন্ট (বিপিএফ)ত যোগদান কৰিছে।
সোমবাৰে দৈমাৰীয়ে আনুষ্ঠানিকভাৱে বিপিএফত যোগদান কৰে।
বিপিএফৰ মুৰব্বী হাগ্ৰামা মহিলাৰী, মন্ত্ৰী চন্দন ব্ৰহ্ম, ৰিহন দৈমাৰী আৰু ৰাজ্যসভাৰ সাংসদ বিশ্বজিৎ দৈমাৰীকে ধৰি বিপিএফৰ শীৰ্ষনেতৃত্বৰ উপস্থিতি দৈমাৰী দলটোত যোগদান কৰে।
অঞ্জলি দৈমাৰীয়ে বড়োসকলৰ সংগ্ৰামৰ বিভিন্ন পৰ্যায়ত সৰৱ ভূমিকাত অৱতীৰ্ণ হৈছিল।
১৯৯২ চনত দৈমাৰীয়ে বড়ো উইমেন জাষ্টিছ ফ’ৰাম গঠন কৰি বড়ো জনগোষ্ঠীৰ মাজত তেওঁলোকৰ অধিকাৰক লৈ সজাগ কৰাৰ কামত আত্মনিয়োগ কৰিছিল।
বড়ো উইমেন জাষ্টিছ ফ’ৰাম যদিও মহিলা সংগঠন, তথাপি ই গোটেই জনগোষ্ঠীটোৰ সমস্যাৰ ওপৰত মাত মাতি আহিছে।
১৯৯৩ চনত অঞ্জলি দৈমাৰী টাডা আইনৰ অধীনত গ্ৰেপ্তাৰো হৈছিল।
মানৱ অধিকাৰ সম্পৰ্কীয় বিষয়ত সৰৱ হৈ অহা অঞ্জলি দৈমাৰীয়ে বিপিএফত যোগদান কৰি সক্ৰিয় ৰাজনীতিত বিশেষ ভূমিকা পালন কৰিব পাৰে।
অৱশ্যে, অঞ্জলি দৈমাৰীৰ হাগ্ৰামা মহিলাৰী নেতৃত্বৰ বিপিএফৰ সৈতে পূৰ্বে মধুৰ সম্পৰ্ক নাছিল যদিও পৰিৱৰ্তিত পৰিস্থিতিত বড়োলেণ্ডৰ ৰাজনীতিত আৰম্ভ হোৱা নতুন সমীকৰণলৈ লক্ষ্য ৰাখি তেওঁৰ বিপিএফত যোগদান গুৰুত্বপূৰ্ণ হ’ব বুলিয়েই বিবেচিত হৈছে।
বি পি এফত যোগ দিয়া সন্দৰ্ভত অঞ্জলী দৈমাৰীয়ে আমাৰ সাংবাদিকক কয়, ‘‘মোৰ কোনো পদ-বাব আদিৰ লালসা নাই, বি পি এফত যোগ দিয়াৰ বাবে কোনো পূৰ্ব নিৰ্ধাৰিত সিদ্ধান্তও নাছিল। বি পি এফৰ ফালৰ পৰা মোক যোগদানৰ বাবে অনুৰোধ জনাইছিল। যোৱা ২৮ বছৰ ধৰি মানৱ অধিকাৰ তথা নাৰীৰ অধিকাৰৰ বাবে কাম কৰি আহিছো। মই ৰাইজৰ বাবে কাম কৰিব বিচাৰো। কিন্তু সামাজিক সংগঠনত থাকি কিছুমান কাম কৰা সম্ভব নহয়, গতিকে এতিয়া সক্ৰিয় ৰাজনীতিত থাকি ৰাইজক সেৱা কৰিব বিচাৰিছো।’’
ইফালে বি টি চিৰ নিৰ্বাচন সমাগত, তেনে সময়ত অঞ্জলী দৈমাৰীৰ দৰে এগৰাকী নেত্ৰীৰ যোগদান তাৎপৰ্যপূৰ্ণ হিচাপে বিবেচিত হৈছে। বি পি এফত যোগ দি দৈমাৰীয়ে বিটিচি নিৰ্বাচনৰ বাবে দলে তেওঁক যি ধৰণেৰে দায়িত্ব দিয়ে সেয়া সম্পূৰ্ণ দলীয় অনুশাসন মানি পালন কৰি যাব বুলি মন্তব্য কৰে।
