গোৱালপাৰা জিলাৰ পঞ্চৰত্নত সংঘটিত হৈছে এক চাঞ্চল্যকৰ ঘটনা। এখন বিলাসী গাড়ীত উদ্ধাৰ হৈছে এগৰাকী যুৱতীৰ মৃতদেহ। পৰিকল্পিত হত্যাকাণ্ড নে দুৰ্ঘটনা সেয়া এতিয়াও ৰহস্যৰ আৱৰ্তত আছে।
অতি ৰহস্যজনকভাৱে গোৱালপাৰাৰ পঞ্চৰত্নৰ হুৰাৰটেকত এখন হুণ্ডাই ভেনু বাহনত উদ্ধাৰ হ’ল এগৰাকী যুৱতীৰ মৃতদেহ। ৰাজপথৰ কাষত ৰখাই থোৱা অৱস্থাত গাড়ীখন প্ৰথমে প্ৰত্যক্ষ কৰে স্থানীয় লোকে।
পুৱাৰ ভাগত পথৰ কাষত গাড়ীখন ৰখাই থোৱা দেখি সন্দেহ ওপজে স্থানীয় ৰাইজৰ। গাড়ীখনৰ ওচৰ চাপি যোৱাত প্ৰত্যক্ষ কৰে চালকৰ আসনত এগৰাকী যুৱতীৰ মৃতদেহ। লগে লগে স্থানীয় ৰাইজৰ মাজত হুৱাদুৱা লাগে।তাৰ পাছতে খবৰ দিয়া হয় আৰক্ষীক। আৰক্ষীয়ে আহি উদ্ধাৰ কৰিলে যুৱতীগৰাকীৰ মৃতদেহ। যুৱতীগৰাকীক হত্যা কৰি দুৰ্ঘটনাৰ ৰূপ দিয়াৰ সন্দেহ স্থানীয় ৰাইজৰ।
ঘটনাস্থলীৰ পৰা উদ্ধাৰ হৈছে যুৱতীগৰাকীৰ পান কাৰ্ড। পান কাৰ্ডত যুৱতীগৰাকীৰ নাম ছালেহা বেগম বুলি উল্লেখ আছে। যুৱতীগৰাকীৰ ঘৰ বকোৰ মাহতলীত বুলি জানিব পৰা গৈছে।
ইতিমধ্যে আৰক্ষীয়ে মৃতদেহটো উদ্ধাৰ কৰি তদন্ত অব্যাহত ৰাখিছে। মৃতদেহ উদ্ধাৰ হোৱা গাড়ীখনৰ নম্বৰ AS 01 FT 9384। যুৱতীগৰাকীৰ নামত আছে গাড়ীখন।
উল্লেখ্য যে, অতি ৰহস্যজনক ভাৱে গাড়ীখনত নাই কোনো দুৰ্ঘটনা সংঘটিত হোৱাৰ চিন। আৰক্ষীৰ তদন্ততহে পোহৰলৈ আহিব ঘটনাৰ প্ৰকৃত ৰহস্য।
