গোলাঘাটৰ বেঙেনাখোৱা ৰেল লাইনৰ কাষত উদ্ধাৰ যুৱকৰ মৃতদেহ
গোলাঘাট ল’ কলেজ ৰোডৰ গুঠু বাউৰী নামৰ ১৮ বছৰীয়া যুৱকজন যোৱা নিশাৰ পৰা সন্ধানহীন হৈ থকাৰ পাছত আজি পুৱা বেঙেনাখোৱা ৰে’ল লাইনৰ কাষত মৃত অৱস্থাত পৰি থকা প্ৰত্যক্ষ কৰে স্থানীয় ৰাইজে।
প্ৰথম অৱস্থাত যুৱকজনৰ ৰেলৰ খুন্দাত মৃত্যু হোৱা বুলি ভাবিছিল যদিও পিছত মুখ আৰু শৰীৰত আঘাতৰ চিন প্ৰত্যক্ষ কৰি এইয়া এক পৰিকল্পিত হত্যা বুলি সন্দেহ কৰিছে পৰিয়ালৰ লোকে।
ইয়াৰোপৰি নিজ বন্ধুবৰ্গৰ সৈতে প্ৰায়ে সময় পাৰ কৰা গুঠুৰ মৃত্যুৰ খবৰ পোৱাৰ পাছতো বন্ধুসকলে খবৰ ল’বলৈও উপস্থিত নোহোৱাত সন্দেহৰ উমান পাইছে পৰিয়ালৰ লোকে।
প্ৰতিনিশাই দেৰিকৈ ঘৰলৈ উভতা গুঠু যোৱা নিশা ঘৰলৈ উভটি অহা নাছিল।সেয়েহে নিশাই কোনোৱে হত্যা কৰি ৰেল লাইনৰ কাষত পেলাই থৈ যোৱাৰ সন্দেহ কৰিছে পৰিয়ালৰ লোকে।
ইফালে ঘটনাস্থলীত সময়মতে আৰক্ষী উপস্থিত নোহোৱাত পৰিয়ালৰ লোকে গুঠুৰ মৃতদেহ নিজ বাসগৃহলৈ লৈ আনে। সমগ্ৰ ঘটনাটো ৰহস্যৰ আৱৰ্তত সোমাই পৰাত এতিয়া এক উচিত তদন্তৰ দাবী তুলিছে পৰিয়ালৰ লোকে।