গোৱালপাৰা জিলাৰ ৰংজুলিৰ ঐতিহ্যমণ্ডিত শ্ৰীশ্ৰী ৰামচন্দ্ৰ বিগ্ৰহত জন্মাষ্টমী উপলক্ষে অনুষ্ঠিত হয় বোকা খেল। দুদিনীয়া জন্মাষ্টমী উৎসৱৰ সামৰণিত পাঁচ শতিকা পুৰণি এক ব্যতিক্ৰমী পৰম্পৰাৰ প্ৰকাশ ঘটে এই বোকাখেলত।
মহাপুৰুষ শ্ৰীমন্ত শংকৰদেৱৰ জীৱনৰ শেষ সময়চোৱাত, ষোল্ল শ শতিকাৰ মাজ ভাগত স্থাপিত শ্ৰীশ্ৰী ৰামচন্দ্ৰ বিগ্ৰহত সোমবাৰে সামৰণি পৰে দুদিনীয়া কাৰ্যসূচীৰ জন্মাষ্টমী উৎসৱৰ।
সোমবাৰে সন্ধিয়া নন্দ উৎসৱেৰে জন্মাষ্টমীৰ সামৰণি পৰে l এই নন্দ উৎসৱত প্ৰায় ৪৫০ বছৰ পুৰণি পৰম্পৰা অনুসৰি বোকাত খেলা হয়। বোকাত লেটি পেটি হৈ হৰি নাম গাই এক অনন্য পৰিবেশ সৃষ্টি কৰে ভক্ত সকলে।
ইয়াৰ মাজতে নাৰিকল বা অন্য ফলৰ ভিতৰত টকা সোমাই দি বোকাত দলিয়াই দিয়া হয় আৰু সেই ফল পোৱাৰ বাবে এখন যুঁজ কৰে। প্ৰবাদ মতে কৃষ্ণ জন্মৰ পিছত গোকুলত নন্দ উৎসৱ পাতি ৰাইজ আনন্দত উত্ৰাৱল হৈছিল। বোকা, পানী, যিয়ে যেনেকৈ পায়, তেনেকৈয়ে খেলিছিল।
ৰংজুলিৰ শ্ৰীশ্ৰী ৰামচন্দ্ৰ বিগ্ৰহতো জন্মাষ্টমীৰ পিছৰ দিনা এই নন্দ উৎসৱ পাতি বোকা পানীৰে তাৰেই প্ৰতীকি ৰূপ এটা প্ৰতিফলিত কৰে। এই পৰম্পৰা চাৰিটা শতিকাৰো অধিক কাল ধৰি ৰংজুলিত প্ৰচলিত হৈ আছে ।
