অসমত পোন প্রথমবাৰৰ বাবে বিধানসভা নির্বাচনত ৮০বছৰ বয়সৰ উৰ্ধৰ আৰু বিশেষভাৱে সক্ষম ভোটাৰসকলে ডাক বেলটযোগে নিজ নিজ ভোটাধিকাৰ সাব্যস্ত কৰিব পাৰিব।
নির্বাচনী বিভাগৰ দ্বাৰা নিয়োজিত বিষয়াই এই ডাক বেলট সমূহ উক্ত ভোটাৰসকলৰ বাসগৃহৰ পৰা সংগ্রহ কৰিব।
ডাক বেলটসমূহ সংগ্রহ কৰিবৰ বাবে ইতিমধ্যেই প্রতিটো গাওঁ পঞ্চায়তৰ সচিবৰ অধীনত একোটাকৈ দল গঠন কৰা হৈছে।
এই ডাক বেলট সংগ্ৰহৰ নীতি-নিয়ম সম্পৰ্কত আজি বোকাখাত মহকুমাধিপতি কার্য্যালয়ৰ সভাকক্ষত গাওঁ পঞ্চায়তৰ সচিবসকলৰ বাবে এক প্রশিক্ষণ কাৰ্যসূচী অনুষ্ঠিত হয়।
পঞ্চায়ত সচিবসকলক প্রশিক্ষণ প্রদান কৰে বোকাখাত ৰাজহ চক্রৰ চক্র বিষয়া (সংলগ্ন) তথা ডাক বেলট কোষৰ ভাৰপ্রাপ্ত বিষয়া শগুফতা আঞ্জোম চোহেলীয়ে।
উল্লেখ্য যে বোকাখাত নির্বাচনী জিলাত মুঠ ৭৪১ গৰাকী ৮০ বছৰ বয়সৰ উর্ধৰ ভোটাৰ আৰু ১২৫ গৰাকী বিশেষভাবে সক্ষম ভোটাৰে ডাক বেলটযোগে আগন্তুক বিধানসভা নির্বাচনত নিজ নিজ ভোটাধিকাৰ সাব্যস্ত কৰিব।
