আজি পুৱা শিৱসাগৰৰ শিৱদ’লৰ সন্মুখত সংঘটিত হোৱা এক চুৰি কাৰ্য্যই লজ্জানত কৰিলে প্ৰতিজন শিৱসাগৰবাসীক।
শাওণমহীয়া ব’ল ব’ম উপলক্ষে শিৱসাগৰৰ ঐতিহাসিক শিৱদ’লত হাজাৰ হাজাৰ লোকৰ সমাৱেশ ঘটে। ৰাজ্যৰ বিভিন্ন প্ৰান্তৰ লগতে চুবুৰীয়া ৰাজ্যৰ পৰাও আহে ভক্তপ্ৰাণ ৰাইজ।
আজি পুৱা অৰুণাচল প্ৰদেশৰ নাহৰলগুনৰ পৰা এ এচ ০৭ এ চি ০৬৯৯ নম্বৰৰ বলেৰ’ গাড়ী এখনত সাতজনীয়া তীৰ্থযাত্ৰীৰ দল এটা শিৱদ’ল প্ৰাঙ্গণত উপস্থিত হয়। আহি পায় তেওঁলোকে শিৱদ’লৰ ভিতৰলৈ যায় পূজা অৰ্চনা কৰিবলৈ।
প্ৰায় বিশ মিনিটৰ পিছত পূজা কৰি ঘূৰি আহি দেখে যে তেওঁলোকৰ গাড়ীখনৰ আটাইকেইখন গ্লাচ কোনোবাই ভাঙি থৈছে।
পৰৱৰ্তী সময়ত তেওঁলোকে গাড়ীৰ দুৱাৰ খুলি সা-সামগ্ৰীসমূহ প্ৰত্যক্ষ কৰি দেখে যে তেওঁলোকৰ পাঁচটা ম’বাইল ফ’নৰ উপৰিও পঞ্চাশ হাজাৰৰো অধিক টকা লুট কৰি নিয়ে।
ঘটনা সন্দৰ্ভত তেওঁলোকে শিৱসাগৰ আৰক্ষী থানাত এজাহাৰ দাখিল কৰে। আৰক্ষীয়ে তদন্ত আৰম্ভ কৰিছে যদিও এই পৰ্যন্ত দুষ্কৃতিকাৰীৰ দলটোক আটক কৰিবলৈ সক্ষম হোৱা নাই।
উল্লেখ্য যে ব’ল ব’ম উপলক্ষে শিৱসাগৰ আৰক্ষীয়ে চহৰখনত নিৰাপত্তা ব্যৱস্থা কটকটীয়া কৰে যদিও দিনৰ পোহৰত দ’ল চৌহদৰ সন্মুখৰ পৰা গাড়ীৰ গ্লাচ ভাঙি কিদৰে দুৰ্বৃত্তই নগদ ধনসহ ম’বাইল ফ’ন লুটি নিব পাৰিলে তাক লৈ জনসাধাৰণৰ মাজত ব্যাপক প্ৰতিক্ৰিয়াৰ সৃষ্টি হৈছে।
দ’ল চৌহদত একাংশ ব্যক্তিয়ে আশ্ৰয় লৈ পৰিৱেশ বিনিষ্ট কৰাৰ লগতে বিভিন্ন সময়ত নানা অপৰাধজনিত ঘটনা সংঘটিত কৰি অহাৰ অভিযোগ উত্থাপিত হৈছে।
এইসকল ব্যক্তিৰ সতি-সন্তানসকলে দিনটো পথচাৰীৰ পৰা ভিক্ষা কৰি ধন আহৰণ কৰে আৰু ৰাতি এইসকল শিশুৱে চুৰি কাৰ্য্য সংঘটিত কৰে বুলি গুৰুতৰ অভিযোগ উঠিছে।
কিছু সমাজ সচেতন ব্যক্তিয়ে এইসকল শিশুক ধৰি নি শিশুগৃহত ৰাখি বিদ্যালয়ত নাম ভৰ্তি কৰি দিছিল যদিও পুনৰ তাৰ পৰা পৰিয়ালৰ লোকে লৈ আনি দ’ল চৌহদত ভিক্ষাবৃত্তিত জড়িত কৰায়।
প্ৰশাসনে দ’লৰ সৌন্দৰ্য্য বৃদ্ধিৰ বাবে দ’ল প্ৰাঙ্গণত থকা দোকান উচ্ছেদ কৰিছিল যদিও এইসকল লোকে দ’ল চৌহদত দিনে-নিশাই ভাত ৰান্ধি পৰিৱেশ বিনষ্ট কৰিছে, একাংশৰ মত।
দুষ্কৃতিকাৰীক ধৰাৰ লগতে এইসকল ব্যক্তিৰ ক্ষেত্ৰতো জিলা প্ৰশাসনক কঠোৰ ব্যৱস্থা ল’বলৈ একাংশ ৰাইজে আহ্বান জনাইছে।
