অসমৰ বান পৰিস্থিতিক লৈ চিন্তিত হৈ পৰিছে বলীউদৰ অভিনেতা এজাজ খান। ছ’চিয়েল মিডিয়াত এটা ভিডিঅ পোষ্ট কৰি অভিনেতাগৰাকীয়ে অসমৰ বানপানী সম্বন্ধে গভীৰ চিন্তা ব্যক্ত কৰি ভাৰতৰ সকলো প্ৰান্তৰ ৰাইজক অসমৰ বন্যাক্ৰান্ত সকলৰ সহায়ৰ বাবে আগবাঢ়ি আহিবলৈ আহ্বান জনায়।
ভিডিঅ’টোত খানে কেৰালাৰ বানপানীৰ প্ৰসংগ উল্লেখ কৰি কেৰালাৰ বানপানীৰ সময়ত সকলোৱে একেলগে ৰাজ্যখনৰ উদ্ধাৰৰ বাবে ওলাই আহিছিল কিন্তু অসমৰ ক্ষেত্ৰত সেইটো হোৱা পৰিলক্ষিত হোৱা নাই বুলি মত প্ৰকাশ কৰে।
আনহাতে, অভিনেতাগৰাকীয়ে অসমৰ ভয়াবহ বানপানীক ৰাষ্ট্ৰীয় টেলিভিশ্যনে কেৰালাৰ বানপানীৰ সমানে গুৰুত্ব নিদিয়া বুলিও অভিযোগ উত্থাপন কৰি প্ৰায় ৫-৬ লাখ লোক বানপানীৰ ফলত গৃহহীন হোৱা অসমকো একেধৰণে সহায় কৰাৰ বাবে সকলোকে আহ্বান জনায়।
তদুপৰি, কেৰালাৰ বানপানীৰ সময়ত ১২ কোটি টকা দান দিয়া চলমান খানৰ দৰে অভিনেতা তথা সহায় কৰিব পৰা লোকসকলক অসমক উদ্ধাৰৰ বাবে আগবাঢ়ি আহিবলৈ তেওঁ অনুৰোধ কৰি কয় যে এই সময়ত অসমে যথেষ্ট অকলশৰীয়া অনুভৱ কৰিছে গতিকে অসমৰ লোকক সহায় কৰাটো আমাৰ কৰ্তব্য কাৰণ অসম ভাৰতৰে অভিন্ন অংগ আৰু অসমৰ জনসাধাৰণক আমাৰ সকলোৰে প্ৰয়োজন আছে।
উল্লেখযোগ্য যে, এজাজ খানৰ উপৰিও বলীউদৰ দুই চাৰিজন অভিনেতা-অভিনেত্ৰীয়ে অসমৰ বান পীড়িতৰ প্ৰতি সহায়ৰ হাত আগবঢ়াইছে। অক্ষয় কুমাৰে ইতিমধ্যে মুখ্য মন্ত্ৰীৰ বান সাহায্য পুঁজিলৈ ২ কোটি টকা আগবঢ়াইছে।
