অসমত বানৰ দুৰ্যোগ: সহায়ৰ আহ্বান বলীউদৰ অভিনেতা জন আব্ৰাহাম, বৰুণ ধাৱানৰ
কৰ’নাৰ আতংকৰ মাজতে বানৰ সংহাৰী ৰূপে অসমত দুৰ্যোগৰ সৃষ্টি কৰিছে। লাখ লাখ বানাক্ৰান্তই এতিয়া ঘৰ-বাৰী এৰি মথাউৰি বা হাইলেণ্ডত আশ্ৰয় ল’বলগীয়া হৈছে।
অসমৰ বানাক্ৰান্তক চৰকাৰে যিধৰণে সাহায্য আগবঢ়াইছে সেয়া পৰ্যাপ্ত নোহোৱাৰ ফলত খাদ্য-আশ্ৰয়ৰ সংকটত ভূগিছে লক্ষাধিক বানপীড়িত লোক।
অসমৰ বানপানীত ব্যথিত হৈ বহু নেতাৰ লগতে চেলিব্ৰেটিয়েও বিভিন্ন মাধ্যমযোগে নিজৰ সহমৰ্মিতা প্ৰকাশ কৰিছে।
ইয়াৰ মাজতে বলীউদৰ দুগৰাকী জনপ্ৰিয় অভিনেতা জন আব্ৰাহাম আৰু বৰুণ ধাৱানে অসমৰ বানাক্ৰান্তলৈ সহায়ৰ হাত আগবঢ়াবলৈ সকলোকে ছচিয়েল মিডিয়াযোগে আহ্বান জনাইছে।
জন আব্ৰাহমে তেওঁৰ টুইটাৰ একাউন্টত অসমৰ বানপানীৰ কেইখনমান দুৰ্যোগপূৰ্ণ ছবি শ্বেয়াৰ কৰি ‘অসমক সহায়ৰ প্ৰয়োজন’ জৰুৰী বুলি উল্লেখ কৰিছে।
Assam needs help… Urgent https://t.co/BeW6Wy3wOh pic.twitter.com/RP3jtDfJ4k
— John Abraham (@TheJohnAbraham) July 18, 2020
অভিনেতাগৰাকীয়ে অসমৰ চৰকাৰৰ সাহায্য পুঁজিৰ লিংক শ্বেয়াৰ কৰি সকলোকে সাহায্য আগবঢ়াবলৈ আহ্বান জনায়।
আনহাতে বলীউদৰ আন এগৰাকী জনপ্ৰিয় অভিনেতা বৰুণ ধাৱানেও অসমৰ বানাক্ৰান্তক সহায়ৰ হাত আগবঢ়াবলৈ ছচিয়েল মিডিয়াৰ জৰিয়তে সকলোকে আহ্বান জনাইছে।
অসমৰ বানাক্ৰান্ত অঞ্চলৰ এখন ছবি শ্বেয়াৰ কৰি বৰুণ ধাৱানে লিখিছে,’অসমক আমাৰ সহায়ৰ প্ৰয়োজন’। ধাৱানে লগতে মুখ্য মন্ত্ৰীৰ সাহায্য পুঁজিৰ লিংকটোও শ্বেয়াৰ কৰিছে।