গুৱাহাটীত আজি বলীউদৰ দুগৰাকীকৈ জনপ্ৰিয় তাৰকাৰে সমাৱেশে অনুৰাগীসকলৰ মাজত ব্যাপক উৎসাহৰ সৃষ্টি কৰিছে। বৰঝাৰ বিমানবন্দৰত প্ৰথমতে আহি উপস্থিত হোৱা বলীউদৰ জনপ্ৰিয় অভিনেত্ৰী তথা ক’ৰিঅ’গ্ৰাফাৰ মালাইকা আৰোৰাক অনুৰাগীসকলে বিমানবন্দৰতে উষ্ম আদৰণি জনায়।
মালাইকাই বৰঝাৰ বিমানবন্দৰৰ পৰা পোনে পোনে চিৰাঙলৈ বুলি ৰাওনা হয়। মোহময়ী অভিনেত্ৰীগৰাকীয়ে চিৰাঙত অনুষ্ঠিত হোৱা দৈজিং মহোৎসৱত অংশগ্ৰহণ কৰিব।
বিমানবন্দৰত সংবাদ মাধ্যমৰ আগত মালাইকাই কয়, ‘’ মই ইয়ালৈ আহি এতি আনন্দিত অনুভৱ কৰিছো আৰু অনুষ্ঠানলৈ যাবলৈ উদগ্ৰীৱ হৈ পৰিছো।‘’
বলীউদৰ ক্ষীণাংগী অভিনেত্ৰীগৰাকীয়ে দৈজিং মহোৎসৱত আয়োজন কৰা এখন ফেশ্বন শ্বো’ত বিচাৰক হিচাপে উপস্থিত থাকিব।
আনহাতে, বলীউদৰ জনপ্ৰিয় গায়িকা নেহা কক্কৰো আজি আহি গুৱাহাটীত উপস্থিত হৈছে। বৰঝাৰ বিমানবন্দৰৰ পৰা পোনে পোনে নেহা হোটেল তাজ ভিভাণ্টালৈ ৰাওনা হয়।
বলীউদৰ জনপ্ৰিয় কণ্ঠশিল্পীগৰাকীয়ে সন্ধিয়া ৭ বজাত সৰুসজাইত এক সাংগীতিক অনুষ্ঠানত অংশগ্ৰহণ কৰিব। বিমানবন্দৰত জনপ্ৰিয় গায়িকাগৰাকীক চোৱাৰ বাবে অনুৰাগীসকলে যথেষ্ট ভিৰ কৰা দেখা যায়।
